講起長洲除咗大魚蛋同芒果糯米糍之外，唔知大家有冇搵過仲有咩地道啲嘅小店呢？今次會一連幾篇同大家分享下喺長洲嘅黃店小店，下次入長洲記得去呀！第一間同大家分享嘅係位於長洲西灣嘅一間cafe：Heima Heima。可能因為地理位置嘅優勢，呢度人流會比較少，但如果公眾假期可能都迫爆人唔出奇。但係西灣店鋪唔多，以前吸引人過嚟嘅原因好可能係張保仔洞就喺度，另外而家仲有個glamping地點。 cafe嘅環境好舒服，入到嚟會令人覺得完全唔似係長洲，間中會聽到沖咖啡嘅聲同店入面播嘅音樂聲，叫一杯咖啡同一件cake就可以好好放鬆下，呢樣先係大家放假最應該做嘅嘢！
長洲其他黃店推介：
長洲黃店：慢活瞬間長洲粒粒雪糕 – 食物全部即叫即煮仲有粒粒雪糕食
Heima Heima：為咗件cake都一定要嚟
呢度嘅蛋糕同瑞士卷都做得好靚，大家可以去Heima Heima Facebook睇下佢哋有咩款，唔怕去到唔知揀咩好！今次叫咗一件蜜糖無花果紅茶卷蛋，味道都唔錯，有好大粒嘅無花果，整體都好清新，連個cream都唔錯！
呢度嘅咖啡都係店主逐杯親手沖，亦都有唔少款式可以揀，有凍有熱，又有傳統咖啡亦有特飲可以揀。想去到長洲都可以放空，就過嚟聽住小店播嘅歌，望出窗，涼住冷氣咁放空一下。
第一次嚟長洲西灣就係為咗Heima Heima
其實都已經嚟過長洲幾次，西灣反而真係第一次嚟，雖然張保仔洞就係喺西灣，就係上面張圖最右手個位置，但係一路以嚟都冇打算過嚟… 但係今次由碼頭行過嚟西灣，就係為咗去支持黃店小店。行路過嚟20分鐘唔洗就到，如果唔想行過嚟，其實係碼頭都有街渡會載遊客嚟西灣，或者租咗單車都可以踩過嚟。
