去旅行前如果有時間可以大約計一計旅遊期間可能會坐到嘅火車費用，因為可能不經意就慳咗唔少車費。今次Raven同屋企人喺大阪京都5日4夜行程入面，就買咗JR西日本發售嘅關西廣域鐵路周遊券，5日入面可以任意乘坐JR特急、鐵路、巴士等，淨係出入機場都夠晒方便，即刻睇吓點樣用啦！
領取關西廣域鐵路周遊券教學
1. 揾啱售票機
今次Raven係喺官網訂飛，到達關西空港站只要帶埋網上訂飛時用嘅信用卡，排隊用一部標示住護照logo嘅售票機就可以拎飛。以Raven拎飛當日，呢幾部機都有用圍欄分隔咗一條隊出嚟，咁就唔會排錯。
2. 選擇語言
喺螢幕右上角揀返中文／英文之後，就揀選返「領取預訂的車票」
3. 選擇領取周遊券
因為預訂嘅周遊券係屬於JR-West，所以呢個位就揀返「JR-West Online Train Reservation」
4. 插入信用卡
呢一步Raven都卡咗一陣關，因為網上訂飛之後會收到Email，入面係有預訂編號嘅資料，所以揀咗右邊，但最後失敗之後同車站員工確認過之後，其實用返信用卡先可以拎得到車飛，咁呢個時候就插入返正確嘅信用卡入去。
5. 確定資格
因為周遊券呢類車飛日本嘅國民係冇得購買嘅，所以呢度只係確認一下你係旅客身份。
6. 接受使用條款
之後再確認其他使用條款，就撳「同意」。
7. 打印車票
之後就係按你買嘅周遊卷數量，逐本護照Scan入去，跟住步驟就完成登記，部機就會打印一大疊票券出嚟。
關西廣域周遊券使用範圍
今次出發前計過數，以京都來回天橋立嘅火車費大約係一萬Yen，而關西機場來回大阪/京都兩程坐Haruka指定席嘅火車費都大約6千Yen，再計埋旅程入面可以免費任搭JR特急/JR地鐵/JR巴士/山陽新幹線等等，如果你嘅行程入面會前往近郊，可能你都適合購買。
乘坐JR特急列車Haruka
由關西機場前往大阪梅田，最簡單直接最快嘅方法應該就係坐特急列車Haruka，期間唔使轉車，車程大約50分鐘。咁下面就將JR官網嘅步驟分享畀大家參考下：
指定席換領教學換領教學
1. 選擇語言
揾返部JR售票機，之後畫面右上角可以揀返適合嘅語言
2. 插入周遊券
將關西廣域周遊券插入去「Ticket･Commuter Pass」嘅入票口
3. 選擇「指定座席票」
插入車票之後，揀選畫面嘅「指定座席票」
4. 選擇「使用回數票預訂指定座席」
見到呢個畫面就揀選返「使用回數票預訂指定座席」
5. 插入其他周遊券(如有同行朋友)
如果有同行嘅朋友需要換飛，咁就可以將其他周遊券再插入售票機，每一次最多可以同時為4個人換取指定席，插晒飛之後就揀選「插入完畢」
6. 輸入欲乘搭列車資料
見到呢個畫面，喺出發站同到達站兩個位置需要用英文拼音揀返正確車站，之後時間要揀返啱日期同時間
選擇車站
順住車站英文拼音打2-3個英文字母，系統可能會自動跳轉，或者手動揀右下角「顯示」
系統會顯示符合所輸入條件嘅車站，之後請點擊適合嘅車站
選擇時間
透個螢幕嘅數字鍵盤揀返時間
跟住就需要決定呢個時間係「出發」定係「到達」
7. 檢索符合條件列車
當輸入完資料之後就可以喺呢個畫面揀選返「檢索」
8. 選擇列車
系統會顯示符合要求嘅列車，由左至右根據列車開出嘅時間排，而列車入面嘅座位多寡就可以咁分：
⭕️ 綠色圈圈：座位數量充足
🔺黃色三角：座位不多
❌紅色交叉：指定席賣晒，需要使用乘坐非指定席
揀好列車後揀選「選擇」
9. 確認列車
呢度需要再確定一次揀啱正確嘅列車，之後揀選「確認」
9.5. 再確認列車
呢一頁官網有寫，不過Raven買幾次都冇出現，可能係視乎路線之間嘅火車比較多選擇，其實都係再揀返啱自己想要嘅時間就OK
10. 選擇座位
揀好班次後，系統會顯示選擇座位嘅選項，想自己揀位嘅就一定要撳「從座位表選擇」
從座位表選擇
畫面顯示嘅圈圈意思：
◎該節車箱較多座位
O該節車箱當餘少量座位
選擇車箱後，喺座位表點擊想要指定嘅座位
完成選擇後點擊「確認」
11. 確認所選擇的列車
系統顯示返所選擇嘅班次、時間、座位等，如果冇問題就撳「確認」
12. 列印車票
最後售票機會打印返一張指定席車票，同你插入去嘅周遊券、其他收據等等
關西廣域周遊券使用方法
由於關西廣域周遊券嘅使用期限係5日，指定席嘅選擇上限係6次，所以使用時要盡量安排符合自己嘅行程安排。經過今個旅行嘅幾次嘗試，可以簡單歸納做下面幾個重點：
- 如果要兌換指定席，過程需要周遊券同護照，周遊券放入售票機後，會連同指定席車飛一齊喺出票口跌出
- 使用指定席車飛嘅時候，需要將周遊券同指定席車飛同時放入入閘機個口度，過閘後記得拎返；1出閘時同樣放入兩張車飛，最後過閘只會拎返周遊券
- 如果真係冇時間換取指定席，其實只要有周遊券喺手，都可以坐自由席(相比指定席車箱，自由席列車座椅冇咁乾淨舒適)
- 如果乘搭非指定席列車，只要將周遊券放入入閘機，閘門開啟就可以出入閘，記得要喺過閘門後拎返張周遊券
- 千祈唔好整唔見，因為冇得重新喺售票機打印(周遊卷5日入面如果用得密，其實都好易整殘，細細張真係好大機會唔為意跌咗)
最後希望呢篇文章幫到大家，亦提提大家其實唔買周遊券，用交通卡坐車都好方便，唔想行程入面不停因為要去揀指定席趕頭趕命，直接用交通卡坐車，喺查飛嘅時候，部份特急列車需要補返特急列車嘅額外收費，到時再畀錢就得。
