打工仔想一收工就飛一轉台灣過個週末，收左工之後喺香港機場出發到台北桃園機場，落左機之後，捷運服務時間過左，應該點樣坐車番出去台北市區？一篇文簡單講晒俾你知！
今次Raven同女朋友收工食埋飯，斯斯然咁出發去香港機場，搭乘聽聞空姐比較高質嘅長榮航空。喺呢一班機提供左少少零食，有菠蘿同朱古力味嘅蛋糕、熱氣脆脆，味道全部都好普通，叫做有啲野咬下咁。
班機起飛時間係晚上21:45，咁落左機之後，入埋境，拎埋行李咁，都12點架喇！捷運都已經停埋，相信大家都唔會想喺機場訓一晚嘅，咁就跟住我地一齊坐「國光客運」去台北車站啦！
當行出左 *第二航廈出境大堂後，向住右邊方向一直走，到盡頭見到郵局就再轉右，又到盡頭嘅時候就會搵到客運巴士站嘅售票處。
我地今次要坐嘅大巴係1819號。全票價係TWD140。
佢嘅班次時間：
凌晨班次： 00:00、00::12、00:24、0036、00:48、01:00、01:20、01:50、02:20、02:50、03:20、03:40、04:00、04:15、04:30、04:45、05:00。
由於1819號線係第二航廈做總站，所以呢度上車就唔怕冇位坐喇！為左避免文章唔更新，價錢時間資料有改，下面提供番個
國光客運官方網址：連結
買好飛之後就可以出去排隊等大巴，候車處喺售票處隔離好方便。記得出去台北車站嘅1819號線係3號月台，唔好行錯。當然睇清楚個牌先好排隊/上車，始終都有可能變嘅。(戴頂頭盔先)
車一到就可以放低行李，職員會派個行李牌俾你，之後就可以上車對號入座坐低喇。車箱位置都鬆動嘅，不過明顯車入面嘅坐位設備都舊，但係有樣驚喜係佢有提供USB充電位俾大家幫手機差電。
咁大概坐左50分鐘，我地就嚟到台北車站。因為係總站等，而呢班車中途都會上客，所以大家訓緊途中都會停下車開下車。
拎齊行李之後就可以行番出去大街，可以截到的士去飯店，又或者學我地咁坐車去西門町唱通宵K。
如果大家對台北車站嘅捷運站熟悉，台北車站其實係可以行去北門站，只係地下街閂左。但路面行過去北門站應該15分鐘，再行15分鐘就到西門町架喇，有腳骨力嘅你冇咩行李都不妨試下。路線圖就請大家開Google Map喇！