高雄台南自由行5日4夜行程分享(2019) Day 3

day3

台南同高雄分別都有由香港開出嘅直航航班,大家下次去台灣不妨參考一下Raven介紹嘅「高雄台南自由行」行程,無論你先到高雄或台南,都可以輕鬆放晒呢兩個城市。而今次旅程嚟到第3日,下午就要坐火車番高雄睇吓最近選總統鬧得熱哄哄嘅韓國瑜市長管治嘅城市。第3日行程如下:

↓撳個廣告可以支持大兄台繼續寫作↓

民宿:樹夏 –> 早餐:無名早餐店 –> 台南火車站 –> 高雄火車站 –> 捷運中央公園站 –> 民宿:時,間 –> 捷運獅甲站 –> kubic –> 台鋁市集 –> 高雄輕軌夢時代站 –> 高雄輕軌駁二逢來站 –> 大草地 –> 瑞豐夜市 –> 愛河之心 –> 新堀江商圈 –> 民宿:樹夏

高雄台南自由行5日4夜 Day 1嘅行程 請到 ?這裡
高雄台南自由行5日4夜 Day 2嘅行程 請到 ?這裡
高雄台南自由行5日4夜 Day 3嘅行程 請到 ?這裡
高雄台南自由行5日4夜 Day 4嘅行程 請到 ?這裡
高雄台南自由行5日4夜 Day 5嘅行程 請到 ?這裡

台南冇招牌一樣人頭湧湧嘅早餐店 ?無名早餐店

喺神農街走過嚟呢間「無名早餐店」唔算遠,都係十分鐘路程咁上下。由於喺台灣Google Map真係好好用,所以大家都可以跟住下面提供嘅地點自己摸索吓。呢間小店其實唔算好隱蔽,因為早上行過嚟會見到好多人排隊等緊,同埋好多電單車泊喺路口等外賣。而早餐選擇都唔少,蛋餅、吐司係基本,而最特別嘅係饅頭夾蛋/肉,一解饅頭味道淡茂茂嘅固有想法。而所有食物即叫即造/加熱,感覺特別良好,想食古早味台式早餐一定要嚟呢度試吓。

台南往高雄 火車高鐵都坐得

神農街係幾架公交車嘅中途站,當中77號公交車係可以番去台南火車站,不過大家要睇住啲時間,因為班次係真係好疏嘅台南啲公交服務。去到台南火車站,只要去櫃位度買入下一班開往高雄嘅自強號(自強號行經嘅站較少,區間車則較多),就會係番高雄最快嘅方法。當然,大家都可以去坐高鐵,不過要留意吓高雄嘅高鐵站係喺左營而唔係高雄火車站,所以要根據自己嘅行程選擇最適合自己嘅交通方法。

將商場改建做民宿唔多好!??時.間. 高雄新堀江民宿

上次Raven同朋友嚟高雄應該係2014年嘅事,當時都有行過新堀江商圈,嗰時覺得個商圈好熱鬧好年輕,好多嘢睇好多人流咁。所以就book咗呢個「時.間.」民宿,對比起台南住嘅民宿,呢間比較起嚟真係好差。首先係房間細到只係放得到雙人床,打開行李之後已經冇位置可以行;廁所可能係因為民宿由商場改建,所以建築方法唔同,不斷傳出異味,要開冷氣先稍為減低問題,Raven屋企人住嗰間問題仲嚴重啲,開冷氣都冇用,所以真係極後悔book咗呢間…仲有嘅係隔音差,由於民宿由商場改建,房間本身應該係冇窗嘅,但係可能因為咁而喺每間房外牆上改裝咗幾扇窗,會透到外面嘅聲,所以喺房間都要留意吓自己嘅聲浪會唔會傳出出面。

另外值得一提嘅係,民宿嘅職員唔係長期喺度,所以做check-in或者可能未拎門卡嘅時候,大家可能係需要line或者打電話聯絡對方,等佢遙距開門,而Raven試過係需要多嘗試好多次先成功開到門嘅。

不過,因為民宿真係好近新堀江商圈,即管而家冇以前咁有人氣,但係到傍晚開始街上都會迫滿唔同嘅人,可能行街可能食嘢咁,只係呢個區好似冇比以前變得更好咁,早上到下晝2點,呢個區基本上係冇嘢開門,大家要留意!

Kubic集盒+台鋁市集+IKEA=獅甲站包辦晒

由台南坐火車去到到高雄,又check-in完,大家都攰攰哋,所以就去咗啲捷運輕鬆到嘅地方,由新堀江商圈附近嘅中央公園捷運站坐車去獅甲站,就可以去到Kubic集盒、台鋁周末市集、IKEA,呢3個地方仲要係地點相斴,實行一次過要去勻三地先得!

Kubic集盒有啲似超迷你版西九自由約,有貨櫃箱改裝成嘅商店之外,草地上有啲攤位做緊工作坊、分享咁,假日買杯咖啡嚟坐吓都唔錯,不過略縑地方較細,攤位同商店未必適合所有人。

IKEA香港有多間分店,所以今次就只係喺門外行經過,冇特登入去,不過睇得出好受台灣人歡迎,門口需要排隊等進入。

台鋁周末市集就有少少似D2 Place One會搞嘅文青市集,不過攤位數量唔多,有一部份係同婚攝相關(因為台鋁商場入面有一個適合擺婚禮嘅場地),除此之外,仲要啲本土小店賣一啲工藝品同自家產品,不過吸引度冇香港匠人嘅作品咁高~支持香港本土設計師!

估唔到嚟台灣都有得坐電車同輕軌 ? 高雄獨有輕軌

高雄近年建成一個新嘅交通工具「輕軌」,同香港一直有嘅電車同輕鐵好似,一樣係喺地面行駛,同輕鐵一樣可以喺月台就嘟卡畀錢同保持單層列車設計,唔同嘅係:
1. 輕軌列車嘅車門有個開門制、
2. 搭乘嘅過程只需要嘟一次卡,無論係車箱嘟定月台嘟,只要嘟過其中一部機就得、
3. 輕軌行經路線冇架空電欖嘅。
之前可能網上面有其他網站介紹過呢個輕軌嘅收費,但今次Raven去高雄係2019年4月,月台上嘅職員同月台張貼嘅告示都有清楚講只要嘟一次就得,唔似普遍公交可能要上下車各嘟一次咁,大家可以留意下。而輕軌列車駛入月台之後,開門閂門停車開車嘅速度都係相當慢嘅,相信係因為每次進站,列車都會用呢段時間差電,所以用時就比起香港嘅電車同輕鐵都慢。而如果車門冇喺入站後自動打開,乘客係可以喺車內外搵到開門制,呢個設定應該係為咗唔好走冷氣同慳電!?

輕軌嘅盡頭係超正大草地 ? 哈瑪星鐵道文化園區

搭乘輕軌去到其中一個總站:哈瑪星,沿途經過見到高雄嘅海岸線,景色都唔錯,當列車慢慢駛到駁二同總站,兩邊行經充滿人流嘅駁二,最後更加喺瑪星鐵道文化園區旁嘅大草地附近落車。香港要搵一幅草地唔係話難,但係要有一幅咁大片嘅大草地,真係好少見。草地上面有擺放好多舊式嘅鐵皮火車畀大家打卡影相,而草地上有人放風箏、有人放狗、有人野餐,但係都唔會阻到另一個人,可見呢片草地有幾大!由呢度行入駁二或者行完駁二準備走,呢度都提供咗一個好好嘅地方畀大家休息。

去高雄必去超大規模夜市? 瑞豐夜市

講到高雄嘅夜市,相信各位都會諗起瑞豐夜市。迫滿呢個夜市嘅並唔單止係遊客,本地人嘅人數都相當之多,因為呢個係高雄其中一個規模最大嘅夜市,入面除咗有嘢食,有嘢行,仲有嘢玩。就喺巨蛋捷運站步行10分鐘就到達,夜市入面有過百間小食店,亦有一啲睇落去生意唔會好好嘅服裝店/小物攤檔,仲有好受歡迎嘅遊戲攤位。最後提提大家,逢星期三,瑞豐夜市係休息㗎!

食飽後可以做啲咩?梗係去消化啦!?

喺高雄想步行消磨時間其實都好多地方揀,想輕鬆行嘅可以去公園或者愛河之心,想血拼又可以去唔同商圈。想增肥嘅各位,更加可以一晚挑戰多個夜市啦!高雄又多個特色夜市,例如勞工夜市(只開周一)、凱旋青年觀光夜市(周四至日)、自強夜市(No OFF)等等。

↓撳個廣告可以支持大兄台繼續寫作↓