喺1月終於收到喺英國HMO寄番嚟嘅全新BNO，由網上填表到寄出去英國到最後收番本新嘅護照，大概用咗3-4星期。以下分享一下續領嘅小小心得。
事前準備做到足先好去填表
可能你睇完我用差唔多一個月先收到新護照覺得好慢，但係只要你填表前準備好唔同嘅文件，咁就可以加快成個步驟。以我為例，我本BNO過期19年，而我本身有特區護照，我就寄出左以下嘅文件：
- 舊BNO
- 出世紙正本
- 父母身份證影印本
- 特區護照
- 特區護照所有頁數彩色影印本
- 住址證明
- 父母結/離婚證書影印本
- Cover letter (主要填番續領護照時提交嘅文件同未能提交部份文件嘅原因）
- 加簽文件
- 可能你仲需要其他文件嘅
證件相要留意
首先你用電話影張證件相，你可以搵個朋友幫你影張相，背景要白色嘅，其他要求係唔可以微笑嘅，大家注意番。背景有影都係唔可以嘅，另外，最重要嘅係你唔可以p相，如果個網上系統 check 到你執過相係要你再提供另一張相嘅。最後喺網上填表upload你滿意嘅相就ok喇，可以繼續填表。
填表要留意
喺填表嘅過程，大家可以喺唔同網站嘅教學睇到，所以我只會分享番一啲我覺得要留意嘅要點。喺填個人資料方面，由於我手上只有第二本BNO，第一本我都唔知喺邊，所以我填護照到期/簽發日期係跟據以前續領第二本嘅BNO資料。喺填父母同祖父母嘅資料時，只需要將知道嘅資料填落去，再喺補充度填寫番唔知嘅原因就得。例如：父母出世紙，可以寫番the document is lost之類；祖父母出生，我係寫My parents don’t know the date之類都得。
寄文件要留意
喺網上面填完表之後，系統會顯示你要提供嘅資料文件，所以如果越早準備好就可以越快寄出喇！為咗收到文件嘅職員有條理咁睇到郵包入面嘅文件，我寫左一封cover letter，簡單列出有咩文件啦，同埋補充番有咩文件或者資料係提供唔到，之後解釋番原因。由於填表最後可以揀sms同email做聯絡，所以對方覺得文件唔充足，都可以聯絡番你，所以建議大家剔晒兩個聯絡方式。最後分享埋我係直接去郵局度寄掛號空郵嘅，並唔係用網上面提倡嘅DHL/Fedex等速遞公司，當中最主要係價錢，我嘅郵件寄去英國係需要HK$47.2，掛號另加HK$15.5，總共係HK$62.7。而大家冇一個信封或者公文袋，可以喺郵局買埋「郵用軟墊信封02」，售價係HK$9。由於速遞公司寄送都係快幾日，一般空郵都係一星期或14個工作天內寄抵，所以唔急嘅可以考慮用香港郵政。
收件要留意
如果你有登記sms/email做聯絡，當英國HMO寄出郵件畀你時，可以盡快收到通知。而英國方面會分別寄出兩個郵件畀你嘅，第一個收到嘅郵件會係你申請時寄出嘅所有文件，例如：出世紙、各類文件正副本。之後會再收到另一個郵件就係新嘅BNO護照喇。拎到手睇番資料正唔正確就可以簽名用㗎喇！
如果你有其他嘢想問，可以點擊下面按鈕fb inbox我，識答嘅我都會盡量答。
