街又冇得出，旅行又冇得去，但係又想體驗下計劃行程、坐火車環遊世界，都仲可以約埋一班朋友一齊玩一款經典Board Game: Ticket To Ride 鐵道任務。呢個遊戲總尾係要鬥高分，過程入面除咗要睇你好唔好彩，仲要睇吓你嘅速度同策略安排，最重要係其他玩家嘅動作有機會一步就打亂晒你所有計劃！
遊戲基本資料
呢盒咁經典嘅Board Game (桌遊) 2004年已經推出，至今推出過好多唔同嘅版本，除咗最原始嘅美國地圖版，先後仲出過歐洲地圖版、印度地圖版、日本擴充包、倫敦擴充包、非洲擴充包等等，由最開始交通方法只有火車道具、到後期有啲版本加入船、的士等等嘅文通工具。遊戲適合2-5名8歲以上嘅玩家遊玩，遊戲時間大概係30-60+分鐘。
鐵道任務玩法
5名玩家輪流行動，透過抽取火車卡牌、擺放火車車卡、抽取路線任務卡牌 3個動作，目標係喺遊戲版圖入面完成唔同嘅任務路線，乘坐最多最遠嘅火車路線，獲得最高嘅分數，從而贏出呢個遊戲。
道具介紹
遊戲版圖
由於今次同大家分享嘅係基本版-美國地圖，所以可以睇到版圖內係一個美國嘅地圖，每個城市都會有一個圓點表示，旁邊會寫住城市名稱，城市圓點同城市圓點之間會有用咗唔同顏色嘅長方形格仔連住，啲格仔代表住兩個城市之間嘅火車路線長度，以及需要用咩色嘅火車卡牌去霸路。
而版圖外圍就係由1到100嘅分數，所有玩家都由0分開始，透過每一次放火車車卡、路線任務卡牌去獲得分數，到遊戲完結嘅時候，擁有最長連續火車路線嘅玩家仲可以拎多10分Bonus。
火車卡牌
火車卡牌總共有9款，分別係粉紅、白、藍、黃、橙、黑、紅、綠同百搭，除咗百搭卡係有14張之外，其他色嘅火車卡都係12張。用法係如果城市同城市之間有一段4格嘅黃色火車路，咁就需要手上有4張黃色火車卡牌 (可用百搭色去取代)先可以霸段嗰段路。另外，部份路線係灰色組成，代表玩家可以用一款顏色嘅火車卡牌去霸路，但係唔可以混用幾款顏色，只可以1種顏色+百搭色。
路線任務卡牌
每張路線任務卡牌都會顯示兩個城市名、位置、分數，只要玩家可以將卡上面寫嘅城市用自己嘅火車車卡連接住，就代表完成嗰張卡嘅任務，就可以獲得卡牌上嘅分數。長度越長，難度就越高，但係分數就越高，所以玩家揀選Keep邊張都要好好考慮下完唔完成到。
遊戲結束計分嘅時候，每名玩家手上如果有未完成嘅任務，就需要按卡上分數扣分。
最長連續火車路線Bonus分數卡牌
遊戲結束嘅時候，擁有最長、連續唔斷、唔計分叉路嘅火車路線，咁嗰名玩家就會額外多10分。
火車車卡
每名玩家擁有45個自己顏色嘅火車車卡，每次要喺遊戲版圖度霸住條路，就需要交出足夠數量嘅火車卡牌，之後就放自己嘅火車車卡去嗰一段路度。
玩家指示物
每名玩家都有1粒玩家指示物，用嚟放喺版圖外圍數字上面計分數用。
遊戲基本setup
將遊戲版圖放喺枱中間，每名玩家分配一種顏色嘅玩家指示物&火車車卡，再將玩家指示物放喺計分圈1分出面；
將火車卡牌洗勻，再每名玩家派發4張，淨番嘅火車卡牌就反轉放到遊戲版圖隔離，再將最面嘅5張卡牌翻開放喺遊戲版圖隔離；
將最長連續火車路線Bonus分數卡牌都放埋喺遊戲版圖隔離；
將路線任務卡牌洗勻，每名玩家派發3張，跟住每名玩家可以考慮保留邊幾張，最少要Keep 2張，亦可以Keep晒。淨番唔要嘅卡就放番去卡堆底。然後將路線任務卡牌堆放喺遊戲版圖隔離。玩家手上嘅任務卡需要一直保密，至直最後計算分數先公開。
遊戲進行方式及基本規則
每個回合，每名玩家必須喺以下3個動作中做一個，完成後就輪到下位玩家做，至直所有人都完成一個動作，就可以繼續下一回合：
- 拎火車卡牌：玩家每次可以最多拎2張火車卡牌，佢可以揀喺翻開嘅5張火車卡牌中拎走2張，或者喺卡堆中拎都得，當每次喺翻開咗嘅卡度被拎走1張，就需要立即補一張去空位度。注意：如果喺翻開咗嘅卡度拎走一張百搭色之後，就唔可以拎第2張卡。但如果係喺卡堆度抽中百搭色，都仲可以拎埋第2張卡。
- 霸火車路：玩家可以利用足夠嘅火車卡牌去霸兩個城市之間嘅路，當中要滿足到嗰條路嘅顏色同數量要求，跟住就可以擺自己顏色嘅火車車卡上條路度，代表你已經霸咗。然後就需要根據所擺嘅火車車卡數量去行分數，分數可以睇番遊戲版圖，或者呢度：1卡=1分；2卡=2分；3卡=4分；4卡=7分；5卡=10分；6卡=15分。
- 抽任務卡：玩家可以揀去抽任務卡，每次可以拎最卡堆頂嘅頭3張，最少要保留1張，最多可以保留晒3張，揀淨唔要嘅就放番入卡堆底。
當有玩家喺佢嘅回合到用淨0/1/2個火車車卡就會觸發End Game，所有玩家，包括觸發End Game嘅玩家都可以行埋最終回合，然後就可以計算分數。
計算分數
計分數相當簡單，由於遊戲進行期間每次霸路都會行咗一定嘅分數，(冇信心嘅可以再計過)，跟住就可以睇自己有冇完成到路線任務，有完成到嘅就加分，冇完成到嘅就要扣分，而擁有最長連續火車路線嘅玩家(s)就再加10分。最高分嘅玩家就會贏；如果咁啱有幾個玩家同分，就根據佢哋完成到嘅任務數量多寡而定輸贏；如果又出現同分，咁就睇吓邊位玩家拎到最長連續火車路線Bonus分數卡牌。
總結
Ticket to Ride 鐵道任務 上手冇咩難度，好啱幾個朋友一齊玩，當你見到有個人玩玩吓，表情越嚟越差，仲會眼超超咁𥄫住你，好可能你霸咗佢條路，或者好驚你突然霸咗佢唯一條出路，呢啲唔出聲都覺得激氣嘅過程真係好好笑。仲有啲朋友拎到成手都係任務卡，以為佢最後好多都完成唔到，點知竟然全部都係啲低分數，但係又真係畀佢行得到嘅任務都真係好激氣㗎！
如果睇完有興趣買可以透過大兄台嘅連結到Amazon (US)買：https://amzn.to/3GnHObD (過程中我哋可以獲得些微報酬支持網站營運，而你並唔需要畀額外金錢)
其他Board Game 推介：7 Wonders 七大奇蹟 Exploding Kittens 爆炸貓
