Splendor璀璨寶石係一款比較經典嘅Board Game，但係加入咗Marvel嘅故事背景同角色，同朋友玩可能就更加容易代入，呢個亦都係Raven入手-Splendor璀璨寶石Marvel版嘅其中一個原因。成個遊戲嘅玩法都好易上手，但係當中都有唔同嘅策略元素，而且Marvel版嘅玩法比原版有少少改變，所以一場嘅時間(4人遊玩)都係40分鐘內可以完場，少人玩就再快啲，好適合情侶或者幾個朋友一齊落場切磋。下面就會分享一下遊戲嘅內容同基本玩法，希望解答到遲遲未入手嘅朋友唔少疑問。
遊戲內容(道具)
盒入面其實唔算多道具，可以見到有一份說明書、唔同嘅寶石代幣，同一疊卡牌，下面會同大家簡單介紹一下唔同嘅道具。
最上一行：無限手套牌(勝利條件)，復仇者牌，地點牌
中間一行：一級角色牌(綠色)，二級角色牌(橙色)，三級角色牌(藍色)，時間寶石代幣(綠色)，SHIELD神盾局代幣(灰色)
↓撳個廣告可以支持大兄台繼續寫作↓
最底一行：空間寶石代幣(藍)，靈魂寶石代幣(橙)，力量寶石代幣(紫)，現實寶石代幣(紅)，心靈寶石代幣(黃)
地點牌總共有4張，兩面分別有唔同地點，比較多人熟悉應該係Thor嘅故鄉-Asgard，黑豹嘅故鄉-Wakanda，銀河守護隊都去過嘅Knowhere。
遊戲最終嘅目標就係用6粒寶石換成End Game嘅無限手套，經過每一回合大家嘅動作，夠16分就有機會獲得勝利！
6款無限寶石都係籌碼咁嘅造型，每一粒都有啲份量，質感都唔錯，而灰色嘅就係代表神盾局嘅代幣。遊戲入面全部動作都圍繞住玩家點樣儲無限寶石，同利用寶石去換唔同嘅英雄牌，務求成功獲得16分。下面會分享一下遊戲嘅設定。
↓撳個廣告可以支持大兄台繼續寫作↓
遊戲設定
基本擺法如下：
- 將3款等級嘅英雄牌分別洗勻，順次序綠色->橙色->藍色咁擺放，之後分別抽最頂嘅4張英雄牌放喺牌疊嘅旁邊
- 將5款無限寶石(紅紫橙黃藍)放喺最底
- 將地點牌放喺角色牌上面
- 將無限手套同復仇者牌放地點牌上面
- 將時間寶石代幣(綠色)同SHIELD神盾局代幣(灰色)放喺地點牌側邊
人數唔同會影響代幣同地點數量，可以參考番：
4人遊玩：隨機抽4張地點牌，所有代幣都要用晒，SHIELD神盾局代幣(灰色)要用晒
3人遊玩：隨機抽3張地點牌，3個時間寶石代幣，其餘紅紫橙黃藍無限寶石每款5個，SHIELD神盾局代幣(灰色)要用晒
↓撳個廣告可以支持大兄台繼續寫作↓
2人遊玩：隨機抽2張地點牌，2個時間寶石代幣，其餘紅紫橙黃藍無限寶石每款4個，SHIELD神盾局代幣(灰色)要用晒
遊戲背景
喺 Splendor璀璨寶石Marvel版 嘅世界入面，每個玩家都係擔任一個隊長嘅角色，任務就係派出唔同嘅英雄去收集無限寶石，目標係透過收集唔同嘅英雄獲得足夠分數，最快獲得16分嘅玩家，就會觸發進行最後一個回合，如果冇其他對手挑戰到你，咁就會贏到呢場遊戲，獲得無限手套，阻止Thanos毀滅世界。
咁我哋即刻睇吓點樣救番呢個世界：
喺每一個回合入面，玩家會輪流從4個動作入面揀一個動作嚟做，做完之後就輪到下一位玩家。而4個動作分別係：
(1)喺無限寶石代幣入面拎3種顏色各一個(手上最多可以拎10個，如果多咗要即刻交番唔要嘅出嚟)
(2)喺一種無限寶石代幣入面拎2個(條件係嗰款代幣要有4個或以上) (手上最多可以拎10個，如果多咗要即刻交番唔要嘅出嚟)
(3)換取英雄，再喺相應嘅卡組拎番一張放入空位
(4)Hold一張英雄牌-再獲得一個SHIELD代幣，SHIELD代幣可以用嚟做百搭嘅無限寶石代幣，如果Hold咗嘅英雄牌最後冇成功換到，就唔會計分
遊戲玩法
每一回合，大家可以拎無限寶石，作為之後換英雄嘅資源，每張英雄牌左下角會標示換取時要花費嘅寶石，左上角會顯示英雄嘅分數，右上角會顯示英雄可以作為其中一款寶石嘅資源，中間最上個Advengers標誌表示收集呢張牌，同時可以收集Advengers分數，多過3分就可以獲得復仇者牌，如果有更高分嘅玩家，咁復仇者牌就會被搶。
換英雄就需要花費唔同數量嘅寶石，上面分別有3張英雄牌，最左嘅豬豬蜘蛛俠係一級，中間嘅War Machine係二級，Captain Marvel係三級。可以睇到越高級嘅英雄就需要越多嘅寶石，所以玩家需要不停拎寶石，不停收集唔同嘅英雄去代替寶石，再去換取更高級嘅英雄，去獲得更高嘅分數。成功換取第三級英雄就可以獲得一個時間寶石代幣(綠色)，每個玩家亦只可以收集1個時間寶石代幣。
而喺收集英雄嘅同時，如果玩家率先收集到地點牌顯示嘅英雄牌數量要求，就可以即刻獲得嗰張地點牌，而呢個動作並唔會計入每回合嘅動作入面。例如某個玩家收集咗4張藍色同4張紅色英雄牌，就可以即刻獲得Wakanda，即時得到3分。
上面就係其中一鋪完場時嘅組合，可以睇到左面有一張復仇者牌同地點牌，得到咗6分，加埋右手邊幾個英雄牌得到嘅10分，再加埋有一粒綠色嘅時間寶石，咁就有16分，觸發最終回合。
勝出條件
如果觸發咗最後回合，其他玩家唔夠16分/同時拎到16分，咁最先夠16分嘅玩家就會勝出。
如果有其他玩家完結時得到超過16分，咁佢就會成為最終贏家。
如果有人喺呢個回合令到得到16分嘅玩家扣分(即係搶走復仇者牌)，令到自己得到16分，咁嗰個玩家就會勝出；如果搶完之後冇玩家得到16分，咁遊戲就要繼續，直到再有玩家夠16分。
購買Splendor璀璨寶石Marvel版
Raven呢一盒Splendor璀璨寶石Marvel版係喺美國Amazon買入，價錢只係大概HK$280，比起香港買價錢會平好多。而且遊戲嘅玩法唔算難，就算入手英文版都唔會話好難明好難學。有興趣嘅朋友可以點擊下面嘅聯盟行銷連結購買，咁大兄台就可以收取少少佣金，繼續寫屬於香港人嘅blog，多謝大家。
保護好卡牌記得買埋卡套(63.5mm x 88mm x 90張)：立即購買63.5mm X 88mm卡套
普通玩家初體驗感想
Raven感受：買咗番嚟第一次玩，分別體驗過2人同3人嘅遊戲，感覺係2人玩嘅節奏好快，而且考慮嘅策略會比較少，因為收集英雄嘅過程唔會好易畀人搶先拎到，但係3人玩就要顧慮多啲嘢，例如究竟自己可唔可以比其他玩家先拎到個英雄，或者係拎到復仇者/地點牌，因為收集英雄過程都會受其他玩家影響，可能會打亂咗自己嘅佈局。加上越多人玩，如果有啲英雄牌未畀人換走，就唔會有新英雄牌放出嚟換，而無限寶石又冇咩選擇，呢啲時候就要睇你會唔會浪費少少資源或者回合去換一張冇咩需要嘅英雄牌。
女友Natalie感受：今次試過2人同3人玩法，覺得2人玩法節奏明快啲，亦都可以集中喺點樣砌自己嘅deck，點樣快啲得到16分。3人玩法就需要多啲考慮，因為始終多個玩家，無論係英雄牌定寶石代幣都好易俾人拎走，所以諗幾時候就要諗多幾步或者幾個方案。越多人玩，亦都要越俾心機去睇實其他玩家嘅進度，一唔小心就會俾人儲夠地點牌/Avengers分，咁進度距離就會拉遠喇。暫時玩咗幾次，都未真係試過hold英雄牌同用shield代幣。不過我相信遊戲設計得呢個hold牌嘅設定，一定有佢嘅用途，希望可以快啲同男朋友玩得熟手啲，試下用埋shield代幣啦！
其他推介Board Game:
