iOS15正式開放下載!4大重點更新吸引用家升級!

上星期完咗Apple秋季發佈會之後，唔知大家有冇預訂到新嘅iPhone13系列電話呢？有預訂到嘅朋友最快9月24號就可以拎機，電話相信都係預載咗iOS15。不過即日起各位iPhone用家已經可以搶先一步體驗iOS15，今次嘅更新改善咗唔少介面同App嘅使用體驗，仲加入幾樣新嘅實用功能。立即睇下呢幾個重點更新有冇吸引到你即刻更新！

iOS15必試：PC同Android都可以用到FaceTime！

iPhone其中一個實用App就係FaceTime，因為視像對話/會議嘅質素高之外，亦都係免費同冇限時，所以好啱同一班朋友或者同身處外國嘅家人使用。只係iOS15之前FaceTime都係iPhone用戶限定，而今次iOS15更新就開放埋畀PC同Android嘅用戶。只要iPhone用戶將FaceTime連結分享畀PC或Android用戶，佢哋就可以透過瀏覽器參加視像會議，而且所有對話都係有點對點加密用嚟保障用戶私隱。

而針對Apple嘅用戶，FaceTime更新仲有一個SharePlay嘅功能，可以將電影/音樂嘅內容喺FaceTime視像對話緊嘅時候分享畀朋友一齊睇。之前Raven都有寫到關於呢次FaceTime嘅更新，大家可以睇番呢度。

iOS15必試：通知中心改靚仔咗

用咗兩年iPhone一直都唔係好鍾意通知中心入面個UI，呢方面Raven一直覺得Android做得好啲。今次iOS15更新之後，App iCon大粒咗，通知暫時堆疊嘅情況都好似有排得好咗。另外，新嘅通知中心仲會透過學習用戶嘅習慣，喺每日朝早時間整合一個通知畀用戶，入面嘅通知就會跟據平時用戶嘅使用去排列重要性，係一個幾實用嘅功能。

iOS15必試：Focus幫你更加專注

可能外國好多地方都有得WFH，所以Apple都想幫手令各位員工可以工作時工作。喺iOS15新增嘅Focus已經自動加入咗控制中心入面，同以前Do Not Disturb合體。喺新嘅Focus入面，用戶可以根據需要自行設定唔同時間自動運行唔同嘅Focus模式。例如朝早10點開始工作，就自動開啟工作Focus設定，淨係公司同事聯絡先收到通知，淨係部份App先可以顯示通知；到6點收工嘅時候就自動取消工作Focus設定，繼而開放收工Focus設定，只有朋友同屋企人聯絡先彈出通知咁。當然，用戶仲可以設定喺鎖機畫面同主頁顯唔顯示其他通知。對於平時成日畀啲通知影響自己做嘢效率嘅朋友算係一個幾唔錯嘅功能。

iOS15必試：Safari介面全面改善

唔知有幾多朋友係用iPhone入面嘅Safari上網呢？Raven自己就一直用開Brave，身邊好多朋友都係用Chrome，最主要原因可能係可以Sync番PC/Mac上面嘅設定同Bookmarks。不過今次iOS15針對Safari嘅UI都有改善，將原本喺畫面上方嘅選單放落畫面下方，喺平時瀏覽網頁嘅時候可以更加容易單手控制。對於一直用Safari上網嘅朋友係一個幾實用嘅功能。

另外，今次仲更新咗分頁管理嘅UI同控制，如果用戶開多過一個分頁，只要左右掃網址列就會轉換分頁。如果撳入去分頁管理嘅畫面，每個網頁都會有更大嘅預覽畫面，另外保留向左掃就係刪除頁面嘅控制。用戶亦都可以將唔同嘅網頁Group埋一齊，透過分類唔同網頁，或者做暫時嘅紀錄，實唔實用等各位試用先知。不過如果你閂晒一個Group入面嘅網頁，Safari仲會繼續保留一個空嘅Group，咁樣就有啲不明所以喇。

iOS15其他更新

其實除咗上面提及到嘅更新之外，iOS15今次其實仲加入咗好多唔同嘅更新，下面會簡單同大家講下：

Live-Text：用戶可以透過相片自動轉譯畫面中嘅文字，畀用戶可以進行複製/修改/翻譯，如果係電話號碼更加可以提供打電話/儲存電話號碼等。實用例子係影低cafe個wifi密碼之後複製去登入wifi。

天氣App：完全大改嘅UI，顯示更多實用資訊，仲有雨量預計嘅動態圖像

私隱：喺電話設定入面私隱頁最底新增咗Record App Activity (紀錄App活動)，用戶可以睇到唔同App幾時存取過定位/Mic/個人資料等嘅紀錄

iCloud+：喺電話設定入面嘅iCloud頁面新增咗Private Replay (beta)同Hide my email兩個新功能，前者係保障用戶用Safari上網時嘅IP地址同瀏覽紀錄，後者係保障用Mail App嘅時候用戶嘅真實電郵地址

另外，更新咗iOS15之後，開App轉場等嘅動畫都流暢咗唔少，另外大家亦都可以上番Apple官方嘅Blog度睇埋更詳細嘅更新內容，仲有呢篇。