每年一次嘅iPhone發佈會你期唔期待？今年除咗iPhone 16系列之外，Apple一次過更新晒所有AirPods，而家全線耳機都可以用USB-C叉電；仲有螢幕再大咗嘅Apple Watch Series 10同Ultra。基本上大部份產品已經可以網上預訂，最快20號就拎到，而iPhone將會喺9月13日開訂，詳細就繼續睇落去啦！
iPhone 16 Pro / iPhone 16 Pro Max
iPhone 16 Pro今年升級副度相當少，當中比較值得一提係多咗相機按鈕、全新機身顏色：沙漠色、螢幕由6.1吋/6.7吋加大到6.3吋/6.9吋，其餘都係得益於換上A18 Pro晶片，唔少軟件上有得到提升。
今年用上A18 Pro晶片，發佈會上提到CPU/GPU效能比上代iPhone 15 Pro分別有15%同20%提升，如果比起13 Pro更加有40%同50%提升，相信由舊版iPhone升級絕對感覺到電話效能提升。
加上iOS18主打嘅Apple Intelligence需要iPhone 15以上先可以使用到，當中唔少實用同有趣功能都值得一試，特別係透過合併emoji可以創造一個全新emoji。
今次iPhone 16系列最主要更新係機身右側多咗一個相機控制「按鈕」，支援輕按、點擊、左右掃等等，喺Lock-Screen狀態點擊可以直接打開相機App，透過輕按或者左右掃可以快速控制更多相機嘅設定。
另外，無論大機定細機，遠攝鏡頭同樣可以做到上代iPhone 15 Pro Max先有嘅5x光學變焦，對細機用家嚟論無疑係其中較大賣點(雖然比起15 Pro都大咗2吋，好難講係細機)。仲有升級咗嘅48M像素超廣角鏡頭除咗有自動對焦外，亦可以用嚟做微距鏡頭。
不過以鏡頭硬件睇落並未有太大升級，唯獨可以拍攝4K120嘅Slow-Motion可能叫有少少升級到。
iPhone 16 / iPhone 16 Plus
比起Pro系列，iPhone 16同樣升級唔多，換上相對A17晶片更慳電嘅A18，電力有幾大程度提升。遊戲方面亦都支援Ray-Tracing，不過AAA大作喺iOS上銷量相當麻麻，究竟有幾大作用就要留待之後再睇。
今次iPhone 16同樣擁有機身右側嘅相機按鈕，鏡頭並冇好大提升，只係超廣角鏡頭而家可以做埋Macro近攝。
iPhone 16 系列售價及預訂日期
今年iPhone 16 Pro售價係$8,599-$12,799，同上年iPhone 15 Pro一樣；而iPhone 16 Pro Max同樣冇加價。發佈會後，iPhone 15/14都有一定程度減價，對於想入手平價iPhone就可以考慮一下。
iPhone 16全系列喺香港時間9月13日晚上8點開始預訂，9月20日起發售。
Apple Watch Series 10
今代Apple Watch Series 10主打歷代最輕、最薄、螢幕最大，而且螢幕用上廣角OLED，可視角度應該更多。加上叉電速度話係歷來最快，只要30分鐘就可以叉到80％電，相信比起Series 9其實只係快啲啲。而今次發佈會仲提到Apple Watch將可以用嚟偵測睡眠窒息症，而且可以透過Health App獲得一份有醫療用途嘅報告畀用戶睇醫生用，未知香港用戶用唔用到呢個功能。
另外，今年手錶有新嘅亮黑色登場，唔鍾意磨砂面嘅朋友就可以諗諗入唔入手。不過咁反光，如果撞花會唔會好礙眼呢？定最後都係要帶銀殼呢…
Apple Watch Ultra 2
今年主要係新加一個黑色錶身嘅版本，同一條全新鈦金屬錶帶，睇片新色更加型格，如果想入手嘅朋友又多一個選擇。
AirPods 4
今次發佈會可能最吸引嘅產品更新係AirPods系列，全線換上USB-C叉電之外，今次AirPods 4都分平貴兩個版本，貴版加入咗主動降噪功能，相信係非入耳式耳機用家嘅福音。另外配備H2晶片，令到用戶可以透過「點頭』同「搖頭」去回應Siri接聽或者拒絕來電。
AirPods Pro 2 軟件更新
嚟緊AirPods Pro用家將會獲得更新，可以透過新增嘅Hearing Aid功能，預防聽力減退嘅問題，軟件亦會評估用家聽力提出建議。
發佈會後感
今年發佈會整體冇咩驚喜，大部份都係軟件更新帶嚟嘅新玩法。不過Apple Watch同AirPods Pro嘅用家就可以期待一下偵測睡眠窒息症同聽力減退兩個功能。最後，今年iPhone 16 Pro值唔值得升級呢？如果你用緊iPhone 12/13，電池續航度都應該唔係幾好，如果想換機不妨升級，因為今代電話算係Apple Intelligence嘅發展初期，雖然中文要下年先支援，仲有機會係得國語冇廣東話，不過好多實用功能相信可以透過轉換地區語言就用到，而且A18晶片效能睇數據係幾唔錯，有興趣記得9月13日預訂喇！
