最近學識咗一款新嘅Card Game，係嚟自日本人設計嘅桌遊：Scout!。玩法同鋤大Dee相似，但係加入咗幾個獨特玩法，融入咗計分機制，過程入面更加唔洗驚一張牌都出唔到嘅情況刺激又好玩！遊戲支援3-5名玩家遊玩，鋤Dee有時少一個凸一個都好尷尬，呢盒Scout!就完美解決呢個問題，文末仲會教大家點樣平價入手，即刻睇吓遊戲介紹先啦！
Scout! 道具介紹
以卡牌遊戲嚟計，Scout!嘅道具都算幾豐富，除咗有英文同日文嘅教學同出招表之外，就係主角45張印有唔同數字嘅卡牌、25個印住S字嘅圓型VP Token、5個正方形Double Action Marker。
遊戲Setup
首先用5人遊玩嚟介紹：將45張卡牌洗勻，每人派發9張卡同1個Double Action Marker；然後再將VP Token放喺枱中間位置，咁就可以正式開始遊戲。
4人遊玩嘅分別：喺派牌之前，收起同時印住「9」同「10」嘅牌 (只有1張)。
↓撳個廣告可以支持大兄台繼續寫作↓
3人遊玩嘅分別：喺派牌之前，收起印住「10」嘅牌 (有9張)。
派完牌之後，就要留意以下規則：
當玩家打開自己嘅牌，有2個規則要遵守：
一、玩家係唔可以執牌，即係唔可以將任何一張牌調整佢嘅位置
↓撳個廣告可以支持大兄台繼續寫作↓
二、玩家開始出牌前，可以自己揀選該局遊戲手牌嘅方向。例如上(左)圖咁係5,5,5,4,5,10,8,5,7、下(右)圖係2,6,10,1,9,7,1,8,3，可以自己衡量邊一副手牌啱玩啲，就可以揀定呢個方向，過程入面係唔畀再調轉嚟玩。
Scout! 玩法介紹
Setup好之後就可以正式開始遊戲，而每名玩家每次行動可以喺3個動作中揀一個嚟做：
一、出牌
玩家需要遵守2個出牌規則，分別係：
上面2張圖就係第1個規則：玩家出嘅卡牌如果2張或以上，必須係相鄰，而且數字必定係順序/倒序係啱嘅，例如3,4,5,6同6,5,4,3係OK，但係4,3,5,6就唔OK嘅。
↓撳個廣告可以支持大兄台繼續寫作↓
第2個規則就係：如果枱面上冇上一名玩家嘅卡牌，下一名玩家可以自由出牌；如果有上一名玩家嘅卡牌，下一名玩家必須出一副大過佢嘅卡。
點為之大過佢呢？5張卡>4張卡>3張卡>2張卡>1張卡；Pair (3,3/3,3,3)>蛇(3,4/3,4,5)；Pair打Pair計最大嘅數字，蛇一樣都係計最大嘅數字。
當你成功出一副大過上一名玩家嘅牌，就可以將上一名玩家出咗嘅卡反轉放到自己嘅面前，成為你嘅分數，每張牌計1分。如果你出唔到大過上一名玩家嘅牌，就可以選擇做下一個動作。
二、Scout!
當你唔夠枱面副牌大，就可以Scout!。即係你可以揀枱面副牌嘅最左或最右嘅牌放到自己嘅手牌當中，放入去手牌嘅時候可以揀你要用邊一個數字成為你嘅手牌。下面係例子：
如果枱面而家係2隻4，而你想儲其中一張卡嘅數字，就可以嗌Scout!，跟住將想要嘅卡，自由揀兩邊雙字嘅其中一邊放入手牌，好似上面例子咁，將4拎返嚟換做6字放入手牌，就可以有5,6,7蛇喇。
當Scout!完，你就需要將一個VP Token交畀枱面副牌嘅出牌玩家，即係畀番一分佢。下一名玩家就只需要出一張大過4嘅牌就可以過。
*如果出面本身副牌係由3張牌組成，Scout!過1張牌，就淨番2張，下一名玩家就要面對2張牌。如此類推。不過如果出面嘅牌畀玩家Scout!晒，再下一名玩家就可以自由出牌。
三、Double Action
最後一個可以做嘅動作係Double Action，用法係當Scout!完，就需要即刻出Double Action Marker，咁就可以立即出牌，唔會畀下一名玩家出到牌。由於每一回合只可以用一次，所以要謹慎使用呢一個Chance。
觸發回合完結
當每名玩家輪流出牌並獲得上一位嘅出牌成為分數，當出現以下兩個情況就會完結該回合：其中一個玩家用晒手牌就會成為該回合贏家；或者冇玩家可以出到大過出面嘅出牌，使出該副牌嘅玩家就會成為該回合贏家。
*如果一個玩家A玩家出咗一副牌，其他玩家手牌唔夠去出牌，每名玩家都Scout!過，都未有玩家夠大去打A玩家副牌，咁就係上面提到嘅「冇玩家可以出到大過出面嘅出牌」。
計算分數
回合完結嘅時候，每名玩家就需要計算總共獲得幾多反轉咗嘅卡牌，每張1分；每個VP Token計1分；如果仲有手牌就每張扣1分，該回合贏家如有手牌就無須扣分。統計最高分數就係真正嘅贏家。
Scout! 好玩過鋤Dee?
Scout! 嘅出牌比起鋤大Dee更加有難度同挑戰性，需要時間同策略去儲一手好嘅牌，之後再根據策略去調整幾時用Scout!、幾時用Double Action去換更多嘅分數。最重要係即使你最先完結回合，如果你過程入面冇好好打贏出面嘅牌去儲分/或者使出強勁嘅卡牌畀人Scout!，你都未必夠分成為真正嘅贏家。雖然鋤Dee都好考策略，但係Scout!嘅遊戲性的確比起鋤大Dee更加豐富，考慮到3-5人都玩得，比起鋤大Dee彈性大好多，所以真心推介畀咁多睇到呢篇介紹文章嘅你哋。所以下面都教番大家點樣可以平價咁買番嚟同朋友一齊玩。
平價入手Scout!嘅方法
香港好多Boardgame嘅網店食水其實都深，所以平時Raven都會盡量喺外國網買番嚟。而Scout! 嚟自日本，所以就喺日本Amazon度買番嚟。
香港唔少網店都賣緊港幣210-240蚊，日本Amazon售價只係2,200yen，即係唔洗港幣130蚊。而日本Amazon部份商品提供國際直送，連運費寄嚟香港都只係港幣180蚊；但係我就選擇咗用Buyandship轉運番嚟香港，運費就只係港幣22蚊，最後152蚊就買到，真係超抵。
大兄台仲有其他Boardgame介紹可以睇吓：爆炸貓 (卡牌遊戲) Terraforming Mars (策略遊戲) 7 Wonders (策略對戰遊戲)
