太子良店：芳華絕代-型格環境食泰國菜
今次嚟太子本身係想食新川嘅米線同炸雞翼，點知咁啱佢冇開，所以就過嚟芳華絕代度食嘢。今次食咗兩碗泰國船麵，一碗係平日經常食到嘅牛肉版，另一碗係潮式口味版本，兩碗湯底一樣香濃好味，加上同樣有大量蔥同芫茜，所以除咗肉味濃郁之外，味道更加香。而潮式船麵有咩特別呢？除咗有有潮州白魚蛋之外，仲有墨丸同豬肉丸(貢丸)，啱晒唔食牛嘅朋友。而餐廳嘅裝修有別於平時食開嘅泰國餐廳，會比較似係酒吧，而餐廳其實真係有唔同酒飲，唔會見到泰皇張相，唔會見到傳統泰國裝飾物。 延伸閱讀：太子黃店-得意貓貓陪你食米線-新川美食深水埗黃店-泰好味泰黃店泰基隆-沙蛙啲給 芳華絕代 泰國菜黃店 芳華絕代 地址
沙田良店：榮樂茶餐廳-香港嘅古早味舊港式茶記
相信茶記係香港人最常食嘅餐廳，但係近年茶記都要美化到唔似係一間茶記，而喺沙田瀝源邨超黃茶樓隔離其實仲有一間舊式嘅屋邨茶記：榮樂茶餐廳，裝修好似停留咗喺90年代電影畫面咁，餐廳門口亦都坐咗唔少食客，食客同餐廳店員有傾有講，常餐嗰頭寫完，轉頭就做好送到嚟，茶記賣嘅正正就係呢種速度同情懷。可惜而家有啲人追求茶記要有西餐廳嘅裝修同擺設，無奈... 最愛嘅常餐個公仔麵係福麵，唔洗加錢㗎，跟餐個包仲可以加錢轉做菠羅包/多士。 榮樂茶餐廳：傳統港式味道 初頭以為常餐個公仔麵會係啲大光麵，問店員有冇得轉做出前一丁竟然冇，原來佢哋係用福麵嘅。沙嗲牛肉都幾香濃，食得出係自己調味，唔係罐頭嘢。餐包本身想轉做菠羅包，可惜賣晒，唯有轉烘底多士啦。火腿奄列個蛋炒得唔錯，略嫌入面啲火腿唔夠多。最後睇埋個裝修，雖然係舊，但係完全唔會覺得污糟！ 榮樂茶餐廳 - 地址
屯門良店：Food Combo-平價港式西餐又幾有特色
最近同屋企人去新墟一間黃店食飯，發現呢間Food Combo原來都幾抵食，一個Main Course跟嘢飲都係$70-90，如果Full Set嘅套餐都係百零蚊，有湯、沙律、小食同餐飲。食物方面，餐廳主要係食港式西餐，有唔同嘅意粉、意大利飯，最近仲有限定套餐係食龍蝦，有興趣嘅網友把握機會去食喇！餐廳環境都坐得幾舒服，店面又乾淨，最滿意係店員好有禮貌，值得一讚！ Food Combo - 簡單菜式一般味道 Food Combo 地址
深水埗良店-泰好味泰良店泰基隆-沙蛙啲給
香港人其實都幾鍾意食泰國菜，又鍾意去泰國旅行，貪佢多嘢食得嚟又平，多嘢買得嚟又平，但係喺香港食泰國嘢絕對唔算平，而泰基隆算係價錢合理嘅，加上佢又夠黃，所以點都應該嚟振興一吓。 泰基隆-地址
九龍灣良店-有飯食仲有蛋卷食嘅“膳心小館”
畀房協迫遷嘅「膳心小館」九龍灣分店做埋11月尾就會結業，大家到時仲想幫襯就要去石硤尾分店喇。而佢除咗有賣自製蛋卷、小食，最近都賣埋月餅，大家可以上佢哋Facebook睇吓。 膳心小館(九龍灣分店)地址 膳心小館(石硤尾分店)地址
銅鑼灣良店-行到入大坑食超正拉麵-凪豚骨拉麵 Ramen Nagi
平日唔食拉麵嘅我，今日同女朋友好少有咁去咗食拉麵，呢間「Ramen Nagi」(凪豚骨拉麵)位置喺大坑，由於店仔細細，行到過去記得聽店員吩咐點排隊，因為排隊人數多可能排到隔離鋪頭係唔得嘅。點咗拉麵坐低之後就可以等上餐，店員好有耐性咁解釋食法，如果冇記錯應該係：首先飲啖湯，之後將碗入面嘅肉球拆鬆撈勻嚟食，黑骨同赤骨都好好味，下次要試埋其他湯底！另外，除咗基本四個湯底，佢哋仲有限定拉麵，記得上佢哋Facebook睇吓呀！ 24/8/2021更新：新店開咗喺渣甸坊，大家可以睇番銅鑼灣黃店：Ramen Nagi凪拉麵-終於開番喇!可能係香港最好味嘅拉麵 Ramen Nagi 凪豚骨拉麵 地址
深水埗良店-黃金廣場外嘅懷舊風格糖水鋪“深深甜品”
一落到深水埗想唔肥都難，黃店又多又好味，食飽晚餐最啱梗係食多碗糖水，怕肥嘅最多咪行上嘉頓山郁動吓囉。呢間喺正黃金電腦廣場對面嘅甜品鋪「深深甜品」，入面裝修都係好傳統懷舊風，糖水又中式又有新式，最重要都係好味囉！ 深深甜品-地址
紅磡良店-睦月-又好味又有人情味小店
住黃埔/紅磡嘅朋友係咪成日落嚟食「睦月」呢？排緊隊就見到老闆同員工都會同食客傾偈，有啲一聽就知佢哋應該係熟客。入面店仔細細，但係食物都係即叫即整，特別係啲炸物，上枱都係熱辣辣脆卜卜。
