檸檬地圖下架-清醒嘅你仲識唔識搵食？
更新：好遺憾檸檬地圖已下架，希望大家以後仲識搵到想食嘅餐廳。另外，無論係飲食定係購物，可以多多考慮同支持本地小店🤧。祝大家平安。 大兄台介紹嘅良店：Link 檸檬地圖 - 簡單易用電腦電話都用得 檸檬地圖唔需要各位裝App，跳過咗App Store同Google Play，咁就唔洗擔心Apple同Google又用啲理由去下架任何同路人必備App啦。下面係電腦嘅畫面，電話畫面會窄身啲。下面有4個圖示，分別係搜尋(放大鏡)、食物分類(飯團)、收藏清單(心心)、關於(檸檬地圖介紹)。 咩係Web App呀？將個Web放入主介面當App用 其實Web App只係將一個網頁，放去電話嘅主介面，詳細方法係點呢？…
屯門良店：CHI Tachinomi-日式串燒店超濃味特式牛肉飯
原來屯門市廣場開咗一間日式串燒店，又有啤酒飲，仲有牛肉飯食，咁大件事冇人講！今次分享畀大家知嘅黃店係CHI Tachinomi，位置相當唔起眼，喺市廣場一期地下，鋪頭喺以前許留山嗰邊，大家可以去地下電器鋪嗰邊行去匯豐銀行嗰邊就會易搵啲。食物方面，今次試咗佢哋嘅大阪牛肉飯，味道好濃，牛肉汁都唔錯，牛肉上面嘅蔥勁足料。 屯門其他黃店分享：很得輝(雞髀專門店) EGGY-韓式多士店 Food Combo-平價港式西餐 隱啡 鬍鬚仔-漢堡包 時光雞-炸雞外賣店 CHI Tachinomi：牛肉勁軟熟份量仲有得加大 今次晏晝過嚟食lunch，落單方法好簡單，只要用電話scan番個qr-code會入番網頁自己落單，食物準備好就會送過嚟。今次叫咗大阪牛肉飯，價錢係$55，加多$5就可以多蔥，所以可以見到我碗牛肉飯上面勁多蔥，超正！牛肉味道好似甜甜地嘅炆牛肉，不過牛肉都炆到好軟熟，好入味，所以都幾好味。下次再去一定要試埋佢哋啲串燒。…
觀塘良店：幸福駅-日式飯糰超多款仲有新豬肉揀
相信觀塘都算係全香港番工最慘嘅地區，好彩想洗錢食飯都可以揀去黃店消費。今次介紹嘅係位於東廣場地下嘅黃店幸福駅 (讀音：驛)，主要賣日式飯糰，官網話款式有20款咁多！除咗一啲粉紅色招牌嘅日式飯糰店都有賣嘅款式之外，幸福駅仲有一啲係用新豬肉OmniPork做嘅飯糰，素食朋友可以去試下！晏晝食飯糰可能有朋友會覺得唔夠飽，小店亦都有賣日式便當，不過Raven認為食兩三個飯團其實都OK！仲可以試多幾個味喎！ 幸福駅：1個唔夠食夠2個囉 今次其實係喺隔離另一間黃店明記黑山羊買咗個外賣，又怕唔夠飽，所以就過嚟買多咗一個新豬肉飯糰。飯糰嘅包裝都係用3拆式嘅拆法，都好易上手。味道方面，紫菜仲係脆口嘅，新豬肉味道唔係好濃，質感同普通肉碎唔大分別，想試新豬肉嘅不妨買呢一款！ 幸福駅 地址
屯門良店：籃子咖啡店-行完藍地水塘必試cafe小店(已結業)
最近天氣時凍時涼，可能好多人都會選擇weekend去行山，咁啱屯門藍地水塘都叫做呃得下人，時不時都有人入嚟行，所以今次介紹一間行完藍地水塘一定要去試嘅cafe！行山友記得帶走自己嘅垃圾呀！今次分享畀大家嘅係位於藍地大街嘅籃子咖啡店，位置相當易搵，驚搵唔到都可以睇番下面嘅Google地圖。小店鋪頭唔算細，不過而家淨係可以每張枱坐兩個人，人多就記得耐心啲等位。鍾意飲咖啡嘅朋友亦都可以選擇外賣，而坐低食嘅朋友，一定要試埋佢哋嘅蛋糕同麵包喇！行完山補充體力吖嘛！ 籃子咖啡店官網有得訂咖啡豆：連結 鍾意咖啡嘅朋友一定要知！ 籃子咖啡店：件蛋糕好好味呀！ 藍地水塘其實好適合行山初哥挑戰，而且風景都唔錯，沿住山路可以遠眺大半個屯門，加上天氣好行完山都唔會覺得好熱濕晒咁。落山去飲杯咖啡食番件蛋糕，之後仲可以繼續坐車去元朗/屯門食其他黃店。而去到籃子咖啡店，首推下面有影到嘅松露朱古力蛋糕！味道超香濃，配上一杯cappuccino真係好正！ 籃子咖啡 地址
屯門良店：時光雞-CP值超高又好味嘅韓國炸雞外賣店
啱啱聖誕放假去咗置樂買時光雞同屋企人過節，預早喺佢哋官網落定單，mark低自取時間，夠鐘行去拎就得，好方便。而時光雞嘅炸雞都係即叫即做，所以拎到外賣就要嗱嗱聲拎番去食喇！唔係就會凍㗎喇！今次真人試範拎咗一段時間先開盒食，炸雞都唔會凍晒，炸雞仍然係脆脆地，味道方面呢，食咗甜辣味、醬油味同蜜糖芥末味，三個味都唔錯！怕食炸雞好寡，就一定要叫埋唔同嘅小食，開Party都輕鬆搞掂！ 屯門外賣可以嚟呢度：慢慢食MaMaEat 時光雞：炸雞小食同樣出色 店員包裝值得一讚，拎完外賣行咗都一段路先番到屋企，外賣盒完全冇爆開，汁醬都冇打瀉。味道方面，甜辣醬味道同韓國比，唔算好正宗，但都係唔錯；醬油味道都唔錯，甜甜鹹鹹咁都好想繼續食；蜜糖芥末味最醒神，酸酸甜甜咁越食越過癮。而小食一定要提黑糖蕃薯條，外脆內軟，味道甜甜地，而且蕃薯蓉都好多，所以食多幾條都飽飽地。而個薯餅因為有芝士所以食多幾啖會覺得膩；兩款餃子因為放得耐咗，所以外皮有啲硬sad。 時光雞 地址
屯門良店：鬍鬚仔-屋邨商場都有好味漢堡包食
屯門本來都有幾間食Burger嘅黃店，但係開多間喺屋企附近點都好啲啦啱唔啱？鬍鬚仔喺友愛邨同安定邨中間嘅愛定商場，就算住市中心/置樂嘅朋友過嚟都好方便。小店鋪面都唔算細，坐滿人都有20個人㗎。而Burger方面全部即叫即做，款式又夠多，份量都好足，可以睇番文章入面嘅相片，想一口咬晒個包真係唔易，仲可能因為太多餡而食到倒瀉籮蟹咁，不過味道係唔錯嘅，下面食咗幾款最推薦係墨西哥脆辣雞堡同四式芝士牛堡，幾有特色。 其他漢堡包店推介：威威美食 (屯門) 嘉寶漢堡 (尖沙咀) 轉角見 (荃灣) 鬍鬚仔：足料burger抵食 講番啲漢堡包先，鬍鬚仔足足有12款唔同口味嘅Burger，大家有興趣可以去佢哋Facebook睇Menu，價錢由$30-50不等，加埋汽水同小食最貴都係加$22，以份量咁足嘅Burger嚟講真係唔錯。如果唔鍾意食牛嘅朋友更加可以試下佢哋幾款冇牛漢堡：照燒玉子雞堡、黑松露大啡菇堡、夏威夷堡。整體嚟講味道都係唔錯，唯一有意見係幾款漢堡食落都會太油，同埋太軟身。 鬍鬚仔 地址
荃灣良店：轉角見-又係好味漢堡包推介呀
今次同大家介紹荃灣一間Burger好好味嘅小店「轉角見」，顧名思義間餐廳真係喺個商場地下轉角個位，不過第一次去可能真係要啲時間搵。餐廳有幾款唔同餡料做嘅漢堡包，有型男漢堡、芝士蘑菇漢堡、煙肉漢堡、經典牛堡，仲有一個期間限定嘅催淚蝦堡。除此之外，餐廳仲有All Day Breakfast同炸角薯條。餐飲有唔同嘅咖啡，仲有唔同嘅特飲，好啱鍾意食漢堡包同快餐嘅朋友。荃灣有好多黃嘅小店，呢間係好值得一試嘅漢堡包店！ 轉角見 荃灣最好味嘅漢堡包 今次同女朋友分別叫咗經典牛堡同轉角特選早餐，飲品叫咗花茶同黃牛！黑牛可能大家飲得多，轉角見就整埋黃牛，即係忌廉+雪糕喇。漢堡包好厚好大份，一切開啲餡都要爆出嚟咁，而塊牛內漢堡扒都好Juicy好有牛味，食落去超滿足。而個All Day Breakfast都唔錯，略縑蒜蓉多士唔夠脆同太少。 轉角見 地址
九龍灣良店：一生懸麵-值得一試嘅拉麵小店
九龍灣區係咪得呢一間拉麵黃店呢？好似係！呢間就係一生懸麵，小店喺德寶花園商場地下，大概得十零個位，所以有機會要排隊㗎！講番拉麵先，佢哋主打名古屋拉麵，仲有撈麵同沾麵揀，當然都仲有其他湯底揀啦！而味道算OK，價錢都算抵！如果唔想過到九龍灣商業區嗰邊，近近地行過嚟都唔錯！ 一生懸麵：主打名古屋拉麵 一生懸麵 地址
