屯門良店：牧羊少年-咖啡之外泰式炒意粉超好味
屯門嘅牧羊少年咖啡館都好咗一段時間，唔知最近會唔會畀壽司郎吸晒啲食客呢。不過如果講吸引，今次同大家分享嘅真係最近食過最好味嘅意粉，而且呢個味道其他地方應該唔會食到，與其幫襯日本連鎖店，不如幫襯下本地黃店啦！今次夜晚去幫襯，客人唔算少，加上座位之間都有一定距離，只要嗰日冇大聲講嘢嘅客人，其實環境真係好舒服，加上食物味道都唔錯，係幾好嘅體驗。 食飽可以去另一間黃店買嘢飲：屯門黃店：尖茶-華都商場地下手調飲品黃店 香炒泰國香椒膏鳳尾蝦意粉 雖然牧羊少年啲食物賣相真係唔可以話好靚，鍾意打卡嘅朋友可能點影都好難影得靚，但係呢碟意粉就係近期食過嘅意粉之中味道最好味最吸引！用咗泰式辣椒膏炒嘅意粉聞落去已經好香，味道相當惹味，Topping有少少花生碎甜甜地中和番個辣味。而意粉旁邊都放咗4-5隻中size鳳尾蝦，口感彈牙唔會梅！ 拿破崙蕃茄野菌本菇長通粉 如果同上面介紹咗嘅泰國香椒膏鳳尾蝦意粉比較，呢份拿破崙蕃茄野菌本菇長通粉真係失色不少。食完充滿辣椒香味嘅意粉，呢份只有淡淡蕃茄醬味就太淡。不過味道其實唔差嘅，只係冇比較冇傷害。其實都係上菜之後先發現叫咗兩份意粉味道都係太相似，應該將呢份意粉轉做其他味道嘅菜式好啲。 蜜桃奶酪藍莓奶酪 今次咗兩杯飲品，因為夜晚唔想瞓唔著，所以冇叫到咖啡，最後叫咗兩杯唔同味道嘅奶酪。藍莓比較酸，比較開胃；蜜桃比較甜，奶酪入面有唔少果肉，口感比較好。 牧羊少年咖啡館加油 其實由牧羊少年咖啡館初初開已經有幫襯，味道都唔錯，不過之後分店慢慢增加之後，就覺得好似比起其他同類餐廳貴。但係最近再去食，就會覺得其他餐廳價錢都加到咁上下，而家反而覺得幾抵食，而且呢個價位呢個味道真係CP值高嘅！而家沙田分店冇開，要等到6月先會重開，希望其他分店可以幫補下，繼續做落去！ 牧羊少年咖啡館 屯門分店地址…
銅鑼灣良店：蘇媽蘇媽-超正宗超足料檳城叻沙
今次去咗一間裝修靚，食物味道又正嘅黃店：媽蘇媽馬來西亞茶餐廳。其實呢間食馬拉菜都好出名㗎喇，不過一直都冇耐性排隊等食，早排見到佢去咗銅鑼灣開新鋪，又唔洗等位所以就決定去試下喇！呢度食嘅叻沙係正宗檳城味道，同外面食到嘅新加坡喇沙完全唔同味！用沙甸魚肴嘅湯味道好特別，加埋鋪面嘅洋蔥、紫洋蔥、椰菜超多，完全顛覆我對喇沙嘅認知。冇得去馬來西亞旅行食好嘢，好彩留喺香港都有唔少良心餐廳用心服務大家，所以大家記得每餐都要去啱餐廳幫襯！ 想食新加坡喇沙可以去：沙田黃店：Mimila-新城市內馬拉菜黃店-有好味喇沙蝦子麵 原來檳城亞參叻沙味道係咁 得到嚟自馬來西亞嘅同事認證，呢碗蘇媽蘇媽嘅叻沙係正宗檳城味道，同其他鋪頭用蝦殼煮嘅湯底好唔同，檳城叻沙會用到沙甸魚嚟煮個湯，味道更加強烈，如果唔食魚嘅朋友可能會覺得有啲腥。而Topping有勁多洋蔥同紫洋蔥，所以食嘅時候可以令到魚味輕輕減低，而且口感都有一定提升。 仁噹牛肉撈麵咖央多士都好食 除咗喇沙好味，其他食物都唔錯，呢碗「仁噹牛肉撈麵」辣辣地又有椰味同甜甜地嘅「椰香咖央多士」都唔錯。下次可以試埋福建蝦麵同白咖哩麵，相信都會係好正宗嘅味道！ 馬來西亞飲品 同新加坡一樣美祿恐龍都係必叫，夠晒甜，啱晒肥仔飲用！另外白咖啡同咖啡都係一樣水準，唔錯。 而家蘇媽蘇媽除咗深水埗之外，其實荃灣、旺角，同Raven今次幫襯嘅銅鑼灣都有分店，想食正宗馬拉菜唔再係咁難啦！ 蘇媽蘇媽銅鑼灣分店 地址
北角良店：野草_雪糕好味之餘間鋪頭痴線咁靚一定要嚟打卡
喺北角和富薈地庫嘅野草 Weeds Gelato & Coffee有間痴線雪糕店冇人講！雪糕店賣天然人工製嘅意式雪糕，味道好呢啲好基本吖！但係佢哋鋪頭個裝修靚到連男仔都想去打卡，你竟然仲未去過？仲要細細聲話你知，如果你鍾意食芫茜，佢哋痴線到有青BB嘅芫茜牛奶雪糕，飲落仲有渣㗎><。除咗食雪糕，打卡都係嚟呢度嘅一個原因，但係點解影相嗰陣咁易就可以影到一張零破綻零路人攝鏡嘅相㗎，因為人流唔多呀！香港人365日都食雪糕，你你你仲唔快啲去試吓！ 搵黃店記得用：檸檬地圖 Lemon Map 建議睇埋：終極黃藍地圖最新出品：檸檬地圖-同路人立即Bookmark 超好味手工製意式雪糕 香港人為咗食啲名牌雪糕甘心喺個商場度排咁耐隊，都竟然唔嚟試吓真係好食嘅雪糕。野草嘅雪糕全部都人手整，味道款式都有好多可以揀，詳情睇番下面嘅Menu。今次叫咗兩份雪糕，一份係鮮薑肉桂蘋果、一份係成棵莞茜牛奶。首先講吓鮮薑肉桂蘋果雪糕，3款主要材料嘅味道都可以好容易食得出，整體都好香好濃，肉桂味唔會太重，所以薑同蘋果味都保留到，整體都好天然。而雪糕個質感層次比較多，入面仲有薑渣，真係真材實料㗎！跟住嚟料係成棵莞茜牛奶雪糕，鍾意食莞茜嘅朋友你一定要試，甜品嘅莞茜可能唔係好多地方有得試，而呢度整嘅雪糕除咗味道好香之外，配埋牛奶令到整體口感同味道提升，質地因為有唔少莞茜渣，所以會食到一絲絲莞茜，真心推介！ 打卡位夠多夠Colorful…
沙田良店：越南仔-平食法國越南菜-原來越南都興蕃茄湯
喺香港想食東南亞國家嘅菜式唔難，好易就搵到日本菜、韓國菜、泰國菜呢啲餐廳，但係食越南菜又好似真係比較少，今次同大家介紹沙田圍嘅黃店：越南仔，正正係主打越南正宗嘅菜式，睇完一次menu你就會發現平時去食小巴黎原來冇咩真正越南菜式。餐廳老細冇去越南學過廚，大部份嘅食物都係以前留學嘅時候，一班越南同學媽咪教佢煮，點解我知？因為鋪頭部電視機loop住條片，你去一次你都會知。食物方面，今次試咗越式嘅蕃茄湯粉同撈檬，味道唔錯，值得下次再去試埋其他嘢！ 搵黃店記得用：檸檬地圖 Lemon Map 食馬拉菜可以睇埋：Mimila-新城市內馬拉菜黃店-有好味喇沙蝦子麵 越南原來都有蕃茄湯 可能都係自己孤陋寡聞，今次去越南仔見到有蕃茄湯所以特登叫咗一碗嚟試，味道同其他地方嘅蕃茄湯好唔同，有種香料嘅香味，加埋好多洋蔥紅洋蔥同炸蒜，令到個湯都幾香幾濃，啲湯汁都會痴住啲麵，唔經唔覺好易食完碗粉，碗湯都冇咗一半。 檬粉彈牙啲肉都好好味 呢碗撈檬個烤肉真係好正，啲人夠軟身唔痴牙，加埋味道都好濃，同啲配菜放埋一齊撈，口感都唔錯。魚露唔會話好鹹好酸，令到啲檬粉唔會得啲魚露味。 飲品都好多嘢揀 今次叫咗紅豆冰同三檸七，平時大家飲龍鳳檸樂可能飲得多，但係黃檸+青檸再+咸檸可能真係少啲，下次可以去試吓！雖然青檸+黃檸嘅味道唔算好突出，容易比咸檸遮住。呢度仲有好多唔同嘅特飲，淨係要試齊想飲嘅都要嚟幾次先得… Menu…
沙田良店：SUPINE-特色漢堡好味CP值超高！(已結業)
沙田經瑞廣場雖然距離新城市真係有段距離，但係如果你想食好味嘅漢堡包，又想支持下黃店就一定要嚟試下SUPINE！佢哋主要都係賣意粉、意大利飯同埋漢堡包，而當中最吸引嘅當然係幾款出面應該食唔到嘅特色漢堡，漢堡包好厚好大份，主菜同啲配料都超足料，味道都唔錯，最重要係幾十蚊已經跟埋薯條同飲品，價錢真係算抵食！與其去啲外國連鎖店排咁長隊等食，不如去幫襯多啲黃店啦！ 京瑞廣場其他黃店：沙田黃店：蒸廬-好味點心唔一定要去茶樓食 搵黃店記得上 LemonMap.io 檸檬地圖 正呀喂！SUPINE 日本咖哩滑蛋吉列豬扒漢堡 SUPINE嘅漢堡包Menu真係唔簡單，淨係漢堡包都有6款，有素嘅、有雞嘅、有牛嘅、有豬嘅，仲有魚嘅，總有一款啱你口味啩！詳細Menu可以睇番最下面嘅Menu相。今次食嘅係日本咖哩滑蛋吉列豬扒漢堡！唔係飯呀，係漢堡！睇圖應該都睇得出好厚好大份啦，所以想拎上手咁咬都唔易，可以搵張紙巾包住食又得，拎起刀叉切開一嚿嚿咁食都得，想點食就點食唔洗理人哋點睇嘅。味道方面，因為有滑蛋同咖哩豬扒，味道其實真係好香好好味，加埋其他配菜，好Fresh好正。跟餐可以揀要薯條或者湯，我就當然揀薯條啦！又粗又脆，比起出面好多薯條都好食！ SUPINE 珍珠帶子法式芥末忌廉汁意大利飯 都唔錯 呢個珍珠帶子法式芥末忌廉汁意大利飯唔算好傳統正宗嘅意大利飯，不過整體味道都OK嘅，個法式芥末唔算話好酸或者攻鼻，所以都可以接受。…
良店髮泥開箱：K髮泥Plus ＆ Firsthand 髮泥 ＠張梁記
唔知各位男士平時係去邊度買髮泥呢？今次同大家分享一間賣好多男士用品嘅黃店：張梁記，佢哋唔淨止賣髮型用品，仲有賣剃鬚用品、頭髮護理等等嘅產品，有實體店仲有Online shop，方便各位大忙人冇時間親自去鋪頭選購就可以網上落單。另外文章入面仲會分享我早排喺張梁記買嘅兩盒髮泥嘅使用體驗：K髮泥Plus 同 Firsthand Supply 混合髮泥髮油。 張梁記Online Shop連結 買髮型用品都要去黃店：張梁記 黃嘅salon其實都唔少，但係如果要搵黃店賣gel頭用嘅髮泥，噴髮膠呢啲可能真係唔易搵。張梁記賣唔少嘅髮型用品，由gel頭用、洗頭用、到保護頭皮用嘅護髮用品都有。 Firsthand Supply…
大埔良店：老虎岩潮式粉麵咖啡-手打燒賣配芝牛蛋治
有時大家過到嚟大埔踩單車又好，行街又好，想搵一間黃店食嘢唔算難，因為幾乎行幾步就有間黃店係隔離。今次同大家介紹嘅老虎岩(第6座)潮式粉麵咖啡，附近正正有得租單車，所以大家租車前或者還車後都可以嚟支持一下。小店入面店員唔多，大家落單等位請畀多少少耐性。食物方面，除咗有出名嘅手打燒賣之外，仲有芫茜燒賣，另外呢度仲有人氣都好高嘅沙茶牛肉麵同牛腩芝士蛋治，記得下次嚟大埔要試吓呀！ 唔好唔記得香港仲有一間超黃嘅共享單車：Loco Bike 大埔其他黃店介紹：共度一燒-串燒店 Blue House-日式西餐 船皇-泰式船麵 老虎岩：小食醫肚冇難度 今次試咗幾樣嘢，包括：沙茶安格斯牛肉麵、牛腩芝士蛋治配蒸燒賣(全日餐)、芫茜燒賣、炸燒賣。一次過食晒3款燒賣，手打燒賣拎去炸，口感同出面食到嘅炸燒賣完全唔同。而沙茶安格斯牛肉麵用上安格斯牛，口感同平時茶餐廳食到嘅牛冧肉口感都好唔同，個沙茶味都好香。全日餐份牛腩芝士蛋治都相當出色，用上牛腩比起其他餐廳嘅蛋牛治用上罐頭鹹牛肉，口感同味道都完全係另一級，而烘底嘅多士永遠都吸引過普通包嘅。呢度仲有其他飯麵餐，所以大家想食飽啲，或者嚟食少少嘢都冇問題。 老虎岩 地址
沙田良店：蒸廬-好味點心唔一定要去茶樓食
沙田除咗有富東閣可以食到黃嘅點心之外，其實行遠少少去石門京瑞廣場(坐車方便啲)都有另一間黃店，細細間餐廳式經營嘅蒸廬。冇茶樓咁中咁多款點心，但係完全冇令人失望，點心即叫即蒸，夠晒熱辣辣，味道都夠水準！嚟到一定要試吓佢哋嘅招牌黑金流沙包，將奶黃包做到咁出色，由白色變做黑色，餡料仲要滿瀉出嚟，強烈推薦大家要試！餐廳人手唔多，落單需要大家scan番qr code，之後喺網頁上面落單，咁就唔會有茶樓漏單嘅問題！ 檸檬地圖搵蒸廬 蒸廬 - 必點流沙包同煎糯米雞 唔知大家平時飲茶鍾意叫咩點心食，今次同女朋友兩個人叫咗4個點心，包括係：黑金流沙包、潮州大粉果、蟹籽燒賣皇同鳳凰煎糯米雞。印象最深刻一定係黑金流沙包，除咗外型上用咗黑色嘅包，包上面仲有金色嘅花紋，建議大家食嘅時候一定要拎定個碗放喺下面，因為一啖咬落去，入面嘅奶黃餡就會瀉出嚟，無負佢流沙之名呀！另外鳳凰煎糯米雞都係推介大家試吓，其他茶樓都好少可以試到煎糯米雞，雖然今次食嗰件糯米雞煎得唔夠乾身，但係下次去相信會有改善嘅。 蒸廬 地址
