中環黃店:Hero’s Friday-如果Burger都係英雄應該就係咁樣!

中環黃店-Hero's Friday

香港都有唔少Burger黃店,分佈喺港九新界,想搵一間好食嘅一啲都唔難,就好似今次介紹畀大家嘅Hero’s Friday,就正正喺中環街市同大館中間位,相當易搵。呢度嘅Burger種類都唔少,有最基本用美國牛肉做嘅傳統漢堡包之外,亦都有豬肉同雞肉嘅漢堡包選擇。當中漢堡包嘅名都係Hero’s Friday嘅一個賣點,又有隊長漢堡,又有磁力漢堡,又有英雄漢堡,而且價錢已經包咗小食同飲品都幾抵食。但講到最特別嘅一定係呢度嘅Burger仲可以加錢將包轉做Panger,超邪惡呀!

↓撳個廣告可以支持大兄台繼續寫作↓

鳳凰漢堡 HK$60:塊雞扒超大塊

Hero's Friday 鳳凰漢堡 HK$60
Hero’s Friday 鳳凰漢堡 HK$60:塊雞扒超大塊

每一個Burger都係即叫即造,所以製作時間普遍都要十分鐘以上,而中環分店上層有少量座位供堂食之用,不過由於空間少比較窄,建議都係外賣方便啲。上面呢個鳳凰漢堡有超大超厚嘅雞扒,而且一啲都唔會硬,食落仲有少少juicy。另外同芥末汁同芝士生菜夾埋一齊,唔會覺得乾身難吞。

隊長漢堡 HK$72:I can eat it everyday

Hero's Friday 隊長漢堡 HK$72
Hero’s Friday 隊長漢堡 HK$72:I can eat it everyday

呢個隊長漢堡都好好味,喺Cheese Burger嘅基礎上面,再加咗煙肉同煎蛋,相當足料!

磁力漢堡 HK$72:大大個洋蔥圈

Hero's Friday 磁力漢堡 HK$72
Hero’s Friday 磁力漢堡 HK$72:大大個洋蔥圈

而磁力漢堡就換上用洋蔥圈,而且都唔細個,加埋個汁一齊食味道都相當好!

有得免費做會員呀!一齊加入英雄聯盟漢堡包行列

Hero's Friday 免費申請會員卡
Hero’s Friday 免費申請會員卡

最近Hero’s Friday搞緊會員制度,只要去食嘢就可以免費拎到會員卡「英雄聯盟卡」!做會員仲有唔少優勢,跟據登記嘅Google Form寫,有呢一張卡喺手,就會得到$50嘅現金券,每消費$1可以得到1個Hero’s Point,每20個Hero’s Point就可以當$1用,另外仲有生日優勢。食一個餐最抵係$60,就可以換到60個Hero’s Point,下次食就可以減$3,變相有95折添呀!

↓撳個廣告可以支持大兄台繼續寫作↓

Hero’s Friday 餐牌

Hero's Friday 餐牌
Hero’s Friday 餐牌

上面係所有Burger,價錢由$60到$93不等,價錢已經包咗一份小食同一杯嘢飲,小食可以揀薯條/薯餅/炸雞粒/牛油粟米,嘢飲就可以揀汽水/咖啡等等。

Hero's Friday 餐牌
Hero’s Friday 餐牌

呢個Panger/班堡都係Hero’s Friday嘅賣點嚟,有興趣嘅朋友可以試下!

Hero’s Friday 中環分店地址

除咗中環店之外,Hero’s Friday喺荔枝角、黃埔、深水埗都有分店!可以Follow佢哋Facebook留意最新消息!

其他Burger黃店推介:嘉寶漢堡 Plan B cafe 轉角見 威威美食 鬍鬚仔

↓撳個廣告可以支持大兄台繼續寫作↓