話說Raven公司搬左過嚟九龍灣，繼之前介紹過灣仔宵夜，今次九龍灣宵夜推介又為大家分享一下究竟九龍灣深夜時份有咩地方可以食到嘢！
奇興美食中心
呢間係經過差唔多一個月時間先搵得到的的確確真真實實有宵夜食嘅餐廳，地理位置亦都比較近工作地點。奇興有提供包房雀局、足球比賽直播，所以凌晨時段都吸引到不少的士大哥過嚟打牌同打躉。
上面分享嘅餐牌係可以宵夜叫得到，所以選擇都好豐富，由晚飯小菜到粉麵飯點都有，所以都唔怕揀唔到。不過提提大家，暫時知道嘅係冬陰功宵夜會停，其他小菜湯飯都會賣完即止。
暫時嘗試過嘅都只係啲韓國麵餐，公仔麵咁，始終宵夜都避免食太飽啦?
兩款麵餐味道都係食開嘅味道，特別提下個雞扒煎得啱啱好，唔會好乾；另外個五香肉丁份量比較細。
相比其他茶餐廳見慣嘅常餐，奇興宵夜就冇提供，所以就可能單調啲，不過區內可以話係只此一間，附近連通宵營業嘅便利台都少之有少，所以都係唔差嘅選擇。
餐廳因為宵夜時段都係服務啲司機大哥居多，所以入面食煙問題都嚴重。而夜晚嘅侍應大哥都好好禮貌，而且點餐有咩問題都會不厭其煩咁答我。
