嚟拜訪觀塘老母除咗體驗下塞爆駿業里，其實都有唔少好食嘅餐廳值得大家塞過嚟試下嘅！今次同大家分享嘅係近觀塘住宅區嗰邊嘅，係一間食水餃嘅餐廳：天園餃子。呢度嘅水餃，全部都係即日包，水餃皮造得好薄身，水餃餡都好多選擇，而辣菜甫都好香又夠辣，加埋一齊食都幾惹味！如果唔想去觀塘，其實土瓜灣同旺角都有分店嘅，下次想食水餃又多個選擇！
天園餃子: 重量級餃子套餐(10隻水餃+小食) $56
如果一心想食餃子，可以叫個重量級套餐，一次過食10隻水餃，仲可以食多一款小食。上面嘅白胡椒雜菌豬肉餃，食落去胡椒味好濃好香，帶有少少辛辣嘅味道，但完全唔係辣嘅，所以唔食得辣嘅朋友都可以試下。水餃皮好薄身，而且口感完全唔覺得厚粉，亦都唔會好有粉味！而湯底係比較簡單嘅清湯，配上濃味水餃都幾好，唔會搶咗個味。而醉雞翼味道都唔錯，而且有3隻，以小食嘅數量嚟講都算多，每隻雞翼上面有一粒杞子，都係浸到好有藥味。
天園餃子: 輕量級餃子套餐(5隻水餃+小食) $48
而韭菜豬肉餃味道都唔錯，雖然呢度水餃嘅size唔算大粒，但係因為個皮夠薄身，個餡食落唔會覺得話唔夠多。如果想飽肚啲，當然建議大家叫個重量級套餐啦！而椒鹽茄子都應該係即叫即炸，上碟嘅時候熱辣辣，不過椒鹽味就唔算好夠，唔夠惹味，不過口感就係外脆內軟嘅！
天園餃子: 自家辣菜甫
每一間好味嘅水餃鋪都有自己嘅菜甫，呢度都唔例外。而天園餃子嘅辣菜甫味道好香濃，辣味亦都好出，配上濃味或者淡味嘅水餃都好夾，加上呢度湯底本身味道都夠清，所以個菜甫就可以調番更刺激嘅味道。鍾意食辣嘅朋友可以試下，食唔到辣嘅朋友就最好淺嘗喇！
