早幾日行過旺角諗唔到食d咩野好，度度都等位都有排等。所以行到過去旺角中心嘅時候就順便落去 鐵牛台灣牛肉麵 望望，之前去過尖東地庫嗰間覺得味道都ok，見到唔多人排緊所以就拎左飛入去食。首先要提一提大家嘅係：鐵牛呢間餐廳喺入座嘅時候，侍應會交低餐牌，筆同點心紙，坐低揀好食咩之後就要剔番想食嘅野之後，要拎住點心紙去門口收銀度俾錢叫野食，所以之其唔好坐低舉手叫侍應黎幫你落單呀。同埋收銀處間唔中都有d自家冷泡茶或者台灣嘅蘋果西打可以買。咁下面就分享一下Raven同女朋友今次點左嘅野食同感想。
咁呢個逄甲鹽酥雞滷肉便當份量唔算多嘅，除左雞同飯之外，仲會跟3碟小配菜，分別有生菜+茶葉蛋+麵筋花生。個生菜配左帶有少少辣味嘅鼓油，味道都幾惹味，想食多d可以叫餐牌上寫嗰一碟嚟食。個茶葉蛋味道都好夠，不過係細粒左少少，同埋隔離嘅醃蘿蔔都有d酸味可以開胃。個麵筋同花生，我獨愛花生。
呢份鹽酥雞唔會做得好濃味，雞肉都唔會炸得好老好硬，所以食落口都仲有少少肉汁。
個滷肉飯味道唔會好濃，滷肉汁啱啱好夠味，不過滷肉同汁都略縑太少，撈勻晒之後啲飯只係略略夠肉汁包住每粒飯。
↓撳個廣告可以支持大兄台繼續寫作↓
份量嚟計，呢份夜市小香腸肉燥乾拌麵都夠女仔食嘅。除左拌麵同啲台灣腸仔之外，仲有跟一碗湯水嘅，不過味道普通d，係蔥味嘅味精湯。
呢份台灣小香腸雖然都唔厚，不過口感都唔錯。味道方面會係似原味台灣腸，不過每塊腸仔上面其實係放左一片蒜頭同少少蔥粒，所以全部放晒入口，就會有蔥嘅香味、蒜嘅辣味同腸仔嘅肉味，口感係比唔食蔥蒜豐富好多。
個肉燥乾拌麵本身有肉汁喺底，蔥花肉燥青瓜絲就喺面，所以一定要撈勻晒食先唔會好乾。味道我覺得個汁本身應該係蔥加鼓油做嘅，所以放落口會食到好香嘅蔥香。
呢份小茄子喺等位嘅時候打開本餐牌就已經想食，所以點左嚟試下。佢嘅面都係放左肉燥同蔥粒，個燒汁味道又唔會好濃，但係Raven覺得唔算太吸引同惹味。
↓撳個廣告可以支持大兄台繼續寫作↓
冬瓜茶太多冰，所以好快個味會淡左，如果鐘意飲濃味嘅冬瓜茶可能要點熱嗰杯試下。
以兩個餐加埋一份小菜，兩杯飲品(其中一杯台灣奶茶唔夠得左影相同我都冇試到味所以唔提咁多)，價錢又唔算好貴。不過今次坐低後都遇過侍應有趣嘅對待，可以反享一下俾大家：我地兩個人坐低左，其中一個餐嚟左冇耐，有一個侍應行過嚟問食物黎齊未？我當時心諗兩個人食飯，但係分明得一個餐黎左，唔通平時其他客人都係咁叫少啲嘅？不過我都係有禮貌咁答佢未齊架。之前去過尖東嗰間分店食過一次，覺得旺角呢間分店座位冇咁鬆動同舒服，地方亦細啲，不過整體都算係一次唔錯嘅體驗。