最近手痕想買多部Android機做後備機，咁平時iPhone做得冇咁好嘅嘢就可以用Android機取代，喺芸芸咁多中價機入面，Raven決定入手SONY Xperia 10 III呢部今年4月推出嘅中價機，究竟評價係唔係真係好似坊間嘅Tech reviewer講到咁差呢？用多一排之後我再慢慢分享畀大家知！下面會同大家做一個簡單開箱，同簡單講番呢部Xperia 10 III用咗1日有咩即時感想。
Xperia 10 III 開箱
官方定價為HK$3,499，Raven入手正值減價活動，售價係HK$3,199，官方仲送多1年原廠保養同一個手機殼。而電話包裝盒入面嘅嘢相當簡單，就係電話一部、充電器一個、充電線一條，同埋一份冇咩內容嘅產品介紹，所有嘢都相當簡潔。當中跟機充電器只係提供7W嘅速度，而電話最快係支援18W快充，如果好介意速度可以考慮買其他品牌嘅GaN充電器。
Xperia 10 III 規格
除咗上面官方標明嘅規格，SONY智能手機最大賣點一定係娛樂體驗，而Xperia 10 III支援有線&無線嘅Hi-Res Audio，亦都有DSEE Ultimate技術提升有線&無線耳機嘅音質。唯一比較可惜係手機只有單喇叭，所以用喇叭播歌音量相對較細。
點解買SONY？
其實中階Android機嘅選擇真係好多，甚至兩千零蚊就買到規格更好嘅電話，好似小米(紅米, 黑鯊, Poco), Oppo(Realme, Oneplus), Vivo, Nokia(HMD代理咗), Motorola(Lenovo買咗), 數之不盡嘅大陸品牌，仲有之前出現過DNS送中嘅Samsung。但係為咗保障番自己少少安全，最後我可以做嘅選擇只係淨番SONY同Google，而SONY行貨一定用到香港5G，而Google水貨9成用唔到香港5G，所以長期用落嘅後備機最後就揀咗SONY最新推出嘅中階機款Xperia 10 III喇。
↓撳個廣告可以支持大兄台繼續寫作↓
入手1天後感覺
入手之前上lihkg見到話香港Firmware比起其他地方遲咗2次update，不過買番嚟之後嗰日就已經update到最新版本，Android安全更新都係8月，所以暫時都唔錯。(如果大家想知版本更新進度可以上https://xpericheck.com/XQ-BT52度check)
Xperia 10 III機面同機背都係用玻璃，只有邊框係先用上膠，手感上都唔錯，感覺比起金屬邊框嘅Xperia 1 III少啲冰冷感。不過如果戴咗手機殼，就可以完全無視。
重量方面，電話有4,500mAh都可以維持到169g重，比起iPhone 11 嘅194g真係明顯輕身。
螢幕用上21:9比例，而且係完整冇凹位或者穿窿，睇戲或者部份唔係16:9嘅Youtube片個視覺效果都唔錯，只係睇16:9嘅片時兩邊容易有大片黑畫面。打機方面，玩Call of Duty或者PUBG，可視範圍都真係好有優勢，兩邊睇多咗少少嘢，雖然冇90fps/120fps嘅螢幕更新率，但呢度都係好多機畀唔到嘅功能。
↓撳個廣告可以支持大兄台繼續寫作↓
如果要講部電話暫時最畀到surprise我嘅，就係Xperia 10 III嘅音質。電話支援TWS+藍芽連線，第一次可以將Nuarl N6 Pro左右兩邊耳機獨立連線，打機同睇片嘅延遲度比iPhone 11明顯減低，而且聽歌音質都明顯提升咗好多，用moov 24bit聽歌，無論人聲定樂器聲都清晰咗。
之後用多一排之後，希望可以再做一個詳細啲分享畀大家。