幾個朋友圍埋一齊想輕輕鬆鬆笑番下，大家可以睇吓下面為大家介紹嘅搞笑board game: Exploding Kittens 爆炸貓。呢款遊戲最刺激嘅位係5名玩家只可以活1個，所以過程入面每名玩家都要善用手上嘅卡，盡量避免自己抽中「爆炸貓」，好啱成班朋友聚會嘅時候玩。如果想更多人玩，除咗支援5名玩家嘅普通版，仲有一盒Exploding Kittens Party 支援最高10名玩家，除此之外仲有好多唔同嘅擴充包。
Exploding Kittens 遊戲基本資料
Exploding Kittens 爆炸貓喺2015年透過眾籌平台Kickstarter集資推出，至今推出咗基本版同多款擴充版，遊玩人數由5名玩家，擴展至最多10名玩家。由於遊戲定位係Party Game，玩法同規則好簡單，基本上玩一次就明，同小朋友或者唔鍾意玩複雜少少嘅Board Game朋友都會好易上手。
Exploding Kittens 遊戲基本玩法
遊戲玩法超簡單，但係同化學老師所講一樣「記性好緊要」。每名玩家主要係透過輪流抽牌，直至其他玩家抽中爆炸貓炸死，死淨嗰位就係贏家。想避開抽中爆炸貓，就要善用手上嘅「拆彈卡」，或者利用其他卡，減少自己抽卡/抽中「爆炸貓」嘅機會。
Exploding Kittens 遊戲卡牌介紹
基本版總共有13款卡，每款卡嘅數量都唔同，所以大家可以有策略咁記一記牌，而下面會逐一為大家介紹每張嘅用途同數量：
Exploding Kitten 爆炸貓
「Exploding Kitten 爆炸貓」總共有4張。只要有玩家抽卡時抽中呢張，就一定要立即Show出嚟畀所有玩家睇到，如果冇「Defuse 拆彈」，咁該名玩家就會炸死，立即輸咗。而如果有「Defuse 拆彈」卡，就可以出一張之後，將揭開嘅「Exploding Kitten 爆炸貓」插番入卡堆入面，自由選擇插去咩位置，但切記唔係可以洗牌！
Defuse 拆彈
「Defuse 拆彈」總共有6張。每名玩家開始派牌之前，都會獲派發一張「Defuse 拆彈」，剩番嘅就會放番入去卡堆度入面，洗勻再派牌，所以有機會其中有玩家喺一開始就獲得多過一張。「Defuse 拆彈」嘅用途就係當你抽中「Exploding Kitten 爆炸貓」嘅時候，用佢嚟做擋箭牌，避過一次死亡嘅機會。
Attack 攻擊
「Attack 攻擊」總共有4張。當有玩家打出呢張卡，佢就可以跳過抽卡階段，直接要下一名玩家抽2次卡。玩家亦都可以將「Attack 攻擊」累積咁用，例如A對B用「Attack 攻擊」，B可以再對C用「Attack 攻擊」，咁C玩家就要最少抽6張卡喇。
Nope 反對
「Nope 反對」總共有5張。玩家可以對任何一名玩家出嘅卡作出反對，亦可以用嚟反對人哋嘅反對，又可以用嚟反對其他玩家對其他玩家嘅卡。
Favor 幫助
「Favor 幫助」總共有4張。當使用呢張卡，就可以強迫指定玩家轉贈一張卡畀用家。唔怪得個心心係黑色，黑心幫助對方快啲冇晒手牌orz
See The Future 預見未來
「See The Future 預見未來」總共有5張。當玩家使出呢張卡，就可以自私睇抽卡堆上面頭3張卡，之後唔可以調亂次序咁放番上卡堆。
Shuffle 洗牌
「Shuffle 洗牌」總共有4張。使出呢張卡之後，就可以將抽卡堆嘅卡重新洗勻。
Skip 跳過
「Skip 跳過」總共有4張。只要使出呢張卡，該名玩家就可以跳過抽卡階段。
Cats 貓貓
遊戲入面仲有5款貓貓卡，每款有4張。佢哋本身單獨係冇用途，唔可以1張咁出，但係只要儲到1對同款，就可以使出1Pair，之後抽指定玩家1張卡，儲夠3張同款咁仲可以指定玩家交出一張你要求嘅卡，如果對方有就必須要交出，如果對方冇就繼續遊戲，冇得收番啲卡。而上述嘅行為係可以用「Nope 反對」抵銷。
Exploding Kittens 遊戲基本設定
遊戲開始前，將所有「Exploding Kitten 爆炸貓」同「Defuse 拆彈」抽出，之後每名玩家派發一張「Defuse 拆彈」，跟住將其他「Defuse 拆彈」放入卡堆洗勻，每名玩家派發7張卡。所有玩家都會擁有7張派發嘅卡+1張 「Defuse 拆彈」 。之後將4張「Exploding Kitten 爆炸貓」隨機放入卡堆後洗勻就可以開始遊戲。
如果遊玩人數唔夠5個人，「Exploding Kitten 爆炸貓」就只需要放入遊玩人數-1嘅數量；「Defuse 拆彈」唔計每人手上嘅1張之外，亦只需要放入遊玩人數+2嘅數量。
Exploding Kittens 遊戲進行方式及基本規則
每名玩家都派咗7張卡+1張「Defuse 拆彈」之後就可以開始遊戲。每名玩家行動嘅時候可以進行2款行為：出卡、抽卡。玩家可以根據情況，揀選出卡/唔出卡，最後必定要喺卡堆入面抽最上面嘅卡，放入手牌當中。如果有玩家使出卡牌之後，只要放到棄牌堆就可以。當有玩家抽中「Exploding Kitten 爆炸貓」，如果佢唔可以使出「Defuse 拆彈」，咁佢就會輸，手牌繼續保持冚埋嘅狀態，其他玩家繼續遊戲，直至剩番1個玩家就會自動勝出。
進階玩法：
玩家只要有2張相同嘅卡，都可以使出後用嚟抽其他玩家1張卡
只要有3張相同嘅卡，都可以使出後要求指定玩家交出一張你要求嘅卡
Exploding Kittens 爆炸貓 基本版+擴充版介紹
上圖基本版同唔同嘅擴充版，如果平時都係3-5人玩，建議直接買番2-5人玩嘅Original Edition，但如果平時都有6-8或者更多，就可以買Party Pack。其他版本只有Imploding Kittens Expansion Set可以增加多1名玩家。
總結
作為一款Party Game，Exploding Kittens 爆炸貓簡單嘅規則令到玩家好易就上手，加上好多唔同嘅卡可以用嚟陷害其他朋友，令到過程更加搞笑，更加激氣。但係玩嘅過程，除咗輸贏，其實卡牌上嘅插畫都好特別，基本上所有功能卡嘅插畫都唔同，每款貓咪都有自己嘅插畫都幾得意㗎！
其他Board Game分享: Terraforming Mars 殖民火星 7 Wonders 七大奇蹟 Splendor璀璨寶石
