2021年Black Friday曾經同大家推介過一啲減價後好值得入手嘅Board Game，今次要介紹嘅就係當時買嘅其中一盒：Terraforming Mars 殖民火星 。比起好多而家流行嘅Board Game唔同，佢嘅遊玩時間長，但係屬於少有可以單人遊玩嘅Board Game，玩法融合輪流抽牌、放置板塊，最後計算分數。呢個係一套既可以合作，又可以互相競爭嘅遊戲，如果大家入手前/後想知點玩，都可以睇下面嘅分享。
Terraforming Mars 基本資料
殖民火星嘅作者係瑞典人Jacob Fryxelius，建議遊玩人數係1-5人，適合14歲以上嘅玩家，遊戲時間大概係90-120分鐘。
遊戲故事背景及基本玩法
喺公元2174年，地球因為人類嘅過度繁衍導致資源極度短缺，如果要繼續生存落去，我哋唯一嘅選擇就係探索外太空，將火星改造成適合人類生活嘅星球。由於成個改造火星嘅計劃需要花費極多資金同時間，世界政府就成立咗統籌部門：改造委員會。而每個玩家將會化身為地球上規模極大嘅公司/機構，協助改造委員會喺火星上嘅改造計劃，建設人類適合居住嘅火星城市。
火星要適合人類生存同居住，有3大指標需要滿足，分別係足夠嘅溫度、 足夠嘅 氧氣含量、足夠嘅海洋，所以玩家代表嘅機構就需要透過唔同嘅改造計劃，為火星製造樹林、海洋，同時亦要為人類建立唔同嘅居住城市、基礎設施。透過每個回合所做嘅最多兩個動作，逐步將火星改造成人類可以居住嘅家。
遊戲道具和卡牌介紹
遊戲嘅道具量相當多，包括咗：火星版圖、海洋板塊、樹林/城市 (雙面)板塊、特別地貌板塊、資源夥粒 (分為1、5、10嘅款式)、玩家夥粒、遊戲條件夥粒、第一位玩家行動標示物、玩家卡板、改造計劃卡牌、公司/機構卡牌。下面會逐一為大家介紹：
火星版圖
火星版圖上面有好多唔同嘅資訊需要注意：外圍嘅數字係TR分數，每名玩家開始遊戲時會喺20分開始；同時呢個TR分數亦會用喺代表回合數上面，所以會放1粒白色嘅遊戲條件夥粒到TR 1分上面，每完成一個回合行1步 (單人遊玩需要喺14個世代 (回合) 入面完成，否則當輸)。版圖左下方有一個標準計劃，每名玩家可以用指定金錢去完成部份改造計劃，例如：用18蚊購買海洋、25蚊興建城市。最下方有里程碑同贊助獎勵，前者係玩家完成指定條件，就可以用8蚊去獲得嗰個分數獎勵，最多只可以完成3個，而且係鬥快嘅；後者係計算遊戲結束嗰時最多嘅玩家可以得到5分，第2名可以獲得2分，同樣係所有玩家只可以贊助最多3個獎勵，而且第1個獎勵係8蚊，第2個係14分，第3個係20分。
海洋板塊
遊戲總共有9塊，係完成遊戲條件之一。只可以放喺火星上面有藍色底色嘅指定位置。 由於海洋唔擁於任何人，就算擺放之後都唔需要擺放自己顏色嘅夥粒上去。
樹林/城市 (雙面)板塊
樹林同城市板塊可以放喺海洋以外嘅位置。放置樹林板塊可以增加氧氣含量1格，之後可以喺TR分數度行多一格。最終計算分數，每個樹林都可以為玩家帶嚟1分；城市板塊基本上冇分數，但係每個城市外圍每有一個樹林，就可以為該城市帶嚟1分。玩家放置後需要擺放自己顏色嘅夥粒代表屬於自己嘅。
特別地貌板塊
部份改造計劃卡牌會指定用家放置特別地貌板塊到火星版圖指定位置上面，例如將火山口板塊放到海洋位置上面。玩家放置後需要擺放自己顏色嘅夥粒代表屬於自己嘅。
資源夥粒
銅色代表1、銀色代表5、金色代表10。每名玩家手上都有6種資源，每樣資源嘅數量都係透過資源夥粒去計算。
玩家夥粒
分別有紅、綠、黃、藍、黑5種顏色。每名玩家需要喺開始遊戲時放1粒到TR 20分位置，亦需要喺自己嘅玩家卡板上每款資源放1粒到代表1嘅格仔上面。
遊戲條件夥粒
白色，體型比起其他夥粒大。分別需要放喺氧氣、溫度、TR上，去追蹤遊戲嘅進度。
第一位玩家行動標示物
一個寫住「1」嘅火星板塊，每名玩家都會順序擔當，所以每完成一個世代就需要將第一位玩家行動標示物交畀下一個玩家，畀佢行先。
玩家卡板
卡板上主要紀錄每名玩家嘅資源，由左至右、上至下分別係Mega Credit 錢、Steel 鋼、Titanium 鈦、Plants 植物、Energy 電力、Heat 熱。而每種資源亦分為圖案、數字部份，圖案部份主要係放置現有/生產咗嘅資源數量、數字部份就係用玩家夥粒去紀錄嗰種資源嘅生產能力。
改造計劃卡牌
遊戲主要係輪流抽呢啲改造計劃卡牌去進行火星嘅改造，每次到Research Phase 研究階段，玩家喺卡堆上抽4張，每keep一張就需要畀3蚊去購買。而到咗Action Phase 動作階段，玩家就需要根據卡牌左上角嘅條件去使用該卡，部份卡牌除咗需要畀錢，仲要符合其他條件，如果完成唔到卡上寫嘅要求，就唔可以使用嗰張卡。而卡牌分咗做綠色、藍色、橙色，綠色係比較普通嘅改造卡、藍色就分2種：Action同Effect卡，Action需要消耗玩家該回合一個動作去進行、Effect就係使用之後持續有效果嘅卡；橙色就係Event 事件卡，當使用後進行咗卡上嘅動作後就需要反轉卡牌，到遊戲完結計算分數先會翻開計分 (如有分)。
公司/機構卡牌
分為2類，一類係新手機構，另一類係普通機構。新手機構喺遊戲開始時，會獲得40蚊、10張改造計劃卡牌；普通機構需要根據卡上標示嘅資源/能力去開始，而且第一輪遊戲抽取10張卡牌之後，每想留一張就需要用3蚊購買。
遊戲基本設定 (Setup)
首先將海洋板塊放上去火星版圖指定嘅位置，將遊戲條件夥粒分別放到TR第1格、氧氣含量0%、溫度-30°C。將樹林/城市 (雙面)板塊、特別地貌板塊、改造計劃卡牌放喺火星版圖附近嘅地方。揀選一名玩家做第一位玩家，派第一位玩家行動標示物畀佢。每位玩家喺各自嘅玩家卡板上面，將玩家夥粒放喺6樣資源嘅1上面，再將1粒玩家夥粒放到TR分數20度。跟住順次序隨機派發每位玩家2張公司/機構卡牌，揀好一間想扮演嘅機構之後同時亮牌，另一張冇揀嘅收集好後可以收埋。順次序每位玩家根據所扮演嘅公司/機構派發資源。跟住順次序每位玩家抽取10張改造計劃卡牌，每名玩家可以揀選購買邊啲卡牌，每Keep一張就要用3蚊去買，冇買嘅需要放出去棄牌堆。當以上步驟做好，遊戲就可以開始喇。
遊戲進行方式及基本規則
遊戲係以Generations 世代 (回合) 去進行，而每個回合包括咗3個階段：Research Phase 研究階段、Action Phase 動作階段、Production 生產階段。由於第一個回合每名玩家都會派發10張卡牌畀大家購買，所以會由Action 動作階段開始遊戲，每名玩家可以輪流進行1或2個動作，直至所有人都決定唔繼續做動作，動作包括：
- 使用手牌上嘅改造計劃卡牌
- 進行Standard Project 標準計劃 (火星版圖左方)
- 申請Milestone 里程碑 (火星版圖左下方)，每款只可以畀1個玩家使用，上限為3款，需放置自己顏色夥粒到Cost同所揀選嘅里程碑上
- 贊助一個獎勵計劃 (火星版圖右下方)，每款只可以畀1個玩家贊助，上限為3款，需放置自己顏色夥粒到Cost同所揀選嘅獎勵計劃上
- 進行藍色Action卡上嘅動作 (記得每個Generation只可以做一次，可以放啲粒粒上張卡做記認)
- 利用8個植物轉換成一塊樹林板塊，再增加氧氣含量1格，再喺TR分數行1步 (如果已經到氧氣含量上限就唔可以再行TR步數)
- 利用8個熱轉換成增加溫度1格，再喺TR分數行1步 (如果已經到溫度上限就唔可以再行TR步數)
而每個玩家需要輪流做第一位玩家 (嗰名玩家要拎住第一位玩家行動標示物)
當每一名玩家都完成動作之後(每個玩家做完一輪，之後可以再揀繼唔繼續做動作，到冇人想繼續做動作) ，就會開始Production Phase 生產階段，喺呢一刻，大家就需要先將電力粒粒移去Heat嘅格仔，之後各位玩家可以根據自己嘅卡板同時進行以下動作：
- 獲得自己TR分數+Mega Credit 金錢生產力嘅錢
- 獲得Steel 鋼生產力嘅鋼
- 獲得Titanium 鈦生產力嘅鈦
- 獲得Plants 植物生產力嘅植物
- 獲得Energy 電力生產力嘅電力
- 獲得Heat 熱生產力嘅熱
- 將電力轉換為熱，由玩家揀選數量
每名玩家用唔同嘅銅/銀/金色粒粒擺放到自己每款資源格上就完成生產階段。
之後就可以將第一位玩家行動標示物交畀下一個玩家繼續進行Research Phase 研究階段，每名玩家喺卡堆抽4張，每留一張就需要畀3蚊，冇購買嘅卡就放出去棄牌堆。跟住再進行Action Phase 動作階段、Production 生產階段，如此類推，直至氧氣含量達到14%、溫度達到8 °C、放晒所有海洋板塊，遊戲就會結束。
計算分數
完結遊戲嘅時候，玩家需要計算以下獲得嘅分數：
- TR 步數
- Milestones 里程碑 (如有)
- Awards 獎勵 (如有)，嗰個獎勵達成度最高就有5分，第2名就有2分
- 手牌上嘅火星標誌分數 (如有)
- 樹林分數，每一塊有1分
- 城市外圍每一個樹林為該城市帶嚟1分
總結
呢一盒Board Game其實唔算難上手，不過官方英文說明書寫得相當差，Raven同女朋友睇完15頁嘅說明書發現入面好多嘢都冇好好解釋清楚，之後到YouTube睇咗好多唔同教學片先了解入面嘅細節，希望大家睇完上面呢篇分享可以更加容易上手同學識呢款幾有挑戰性嘅Board Game，帶有策略嘅元素，亦可以同其他玩家邊合作邊傷害，唔想次次都玩無聊9up game，可以考慮買。
保護好卡牌記得買埋卡套(63.5mm x 88mm x 233張)：立即購買64mm X 89mm卡套
如果透過以上Amazon連結成功購買，大兄台將獲得些微報酬，多謝支持。
其他Board Game推介：
