Board game唔係嚟嚟去去都係得一堆卡，一堆粒粒同一塊板咁悶嘅！今次同大家介紹嘅桌遊《Wingspan》中文譯名：展翅翱翔，遊戲用鳥類研究做背景，所有道具、卡牌插畫都同雀仔有關，相當精美。不過千祈唔好畀咁靚嘅外觀呃到，遊戲好講求策略同卡牌連動，鍾意用腦嘅朋友一定會覺得好玩！想知詳細玩法就繼續睇落去啦！
Board game 介紹
《Wingspan》係一款適合1-5位玩家一齊玩嘅Board Game桌遊，喺遊戲入面每位玩家將化身成愛雀之人，最鍾意觀察、研究、收集各式各樣嘅雀仔，透過各式動作，務求令到自己嘅野外雀仔園吸引到最多雀仔。每位玩家嘅雀仔園都分別有3個棲息地：樹林、草原、濕地，所以遊戲期間玩家可以接觸到各式各樣嘅鳥類，由麻雀仔到貓頭鷹都會登場。遊戲入面玩家透過擲骰、收集雀仔，發動每張雀仔卡上獨有嘅力量，互相競爭目標係拎到最過嘅分數。
遊戲開箱 & 收藏放置
Wingspan所有道具加埋都唔少，重量都唔輕，而且所有印刷同造工都唔錯！
同好多Board Game唔同，Wingspan所有道具放入盒之後真係冇咩虛位，大部份道具都附送咗透明盒仔裝住，唔怕拎出拎入嘅時候整到散晒。
↓撳個廣告可以支持大兄台繼續寫作↓
卡牌 & 道具介紹
大家見到上面開箱圖都見全盒Wingspan嘅道具量真係唔少，不過因為佢哋用途都十分清晰，唔怕會混淆，下面同大家介紹返咁多款道具。
玩家板塊 & 行動方塊
盒內有5塊玩家板塊，亦都有5種顏色各8粒嘅行動方塊，每位玩家需要拎返一套相同顏色嘅方塊。玩家板塊資訊都唔少，包括咗以橫行顯示玩家可以進行嘅4個動作：i)Play A Bird 放置雀仔 ii)Gain Food 獲得食物 iii)Lay Eggs 生蛋 iv)Draw Bird Cards；直行就係顯示每個動作可以獲得嘅道具量；喺最頂有啲蛋嘅icon，顯示放置喺同一棲息地第2/3/4/5隻雀仔嘅時候，成本分別要加多1/1/2/2粒蛋。
雀仔糧食 & 雀仔蛋
雀仔糧食分別係由老鼠（啡）、昆蟲（綠）、魚類（藍）、莓果（紅）、殼物（黃），唔同類型嘅鳥類都會食唔同嘅食物，大家玩熟啲大概會留意到邊類雀仔主要食咩食物，之後就要儲相應食物用嚟做cost去放置雀仔。而雀仔蛋就由5隻顏色共75隻組成，遊玩期間如果進行生蛋動作，玩家就可以拎相應數量嘅蛋，放到雀仔卡上，冇指定拎邊款顏色。
雀仔塔
呢座Birdfeeder雀仔塔係用嚟擲骰用，當需要擲骰嘅時候，拎相應數量嘅骰仔放入骰仔塔背面入口，骰仔就會經過塔入面嘅機關跌返落嚟。每次有玩家進行獲取食物呢個動作，都需要喺呢度揀食物，然後將嗰粒骰擺出去旁邊位置，當入面淨返一粒/只有一款嘅時候，就可以重新擲骰。
↓撳個廣告可以支持大兄台繼續寫作↓
回合目標板塊 & 目標方塊
回合目標板塊有正反兩面，玩家可以揀其中一面去進行遊戲：一面係回合目標鬥多去排名次；一面係完成目標次數去得分。而目標板塊上面需要喺8個雙面嘅目標方塊，抽其中4個嘅其中一面，作為4個遊戲回合入面嘅指定目標。
雀仔卡 & 雀仔屋
#上面係雀仔適合嘅棲息地，下面係佢哋嘅食物種類：部份雀仔可以棲息喺多過一個地方，放置雀仔卡到自己嘅玩家板塊就會靈活啲，而食物就係放置卡牌時需要畀嘅cost，如果有彩色就代表任可顏色
# i) 羽毛代表分數 ii)雀巢類型：平台/碗/機洞/地面/野外（百搭）iii)生蛋數量上限
#雀仔名
↓撳個廣告可以支持大兄台繼續寫作↓
#Wingspan 雀仔展翅嘅長度，部份回合目標/玩家Bonus要求
#雀仔力量：未必每隻雀仔都有，部分力量係放置時觸發，放份係玩家進行動作時觸發
#雀仔現實棲息地
遊戲進行期間，玩家可以喺雀仔屋上面打開咗嘅3隻雀仔揀一張卡 / 抽雀仔卡疊最面嗰張。
遊戲SETUP
遊戲開始前需要將所有道具分配同放置好：
- 將雀仔卡洗勻後，卡背朝向上放置喺遊戲區，將卡牌最頂3張卡打開放喺中間供應區嘅雀仔箱
- 將雀仔糧食同雀仔蛋放到供應區
- 將所有骰擲入雀仔塔
- 揀選目標板塊其中一面朝向上
- 抽選4個目標放到回合目標板塊上
- 將所有Bonus卡洗勻後，卡背朝向上放喺遊戲區
之後到每位玩家進行以下嘅準備：
- 分配 i)玩家板塊、ii)8粒同顏色嘅行動方塊、iii)5張雀仔卡、iv)2張Bonus卡、v)每款雀仔糧食各一 畀每位玩家
- 每位玩家需要選擇保留幾多張雀仔卡，每保留1張，就要交出一個雀仔糧食；唔保留嘅雀仔卡就需要放到棄卡區
- 選擇1張Bonus卡，另一張放到棄卡區
- 選擇邊位玩家開始遊戲，再將首位玩家牌交畀佢
回合進行
遊戲分為4個回合，以順時針咁進行，每位玩家可以由4個動作入面揀選做其中一個動作，然後每位玩家輪流進行。當每位玩家喺該回合輪流行動之後，用晒行動方塊，代表該回合完結。每回合完結後需要進行以下整理：
- 將所有行動方塊移離玩家板塊
- 計算回合目標板塊嘅分數，每位玩家放置一粒行動方塊到該回合格仔
- 第1回合：每位玩家有8粒行動方塊 (8個動作)
- 第2回合：每位玩家有7粒行動方塊 (7個動作)
- 第3回合：每位玩家有6粒行動方塊 (6個動作)
- 第4回合：每位玩家有5粒行動方塊 (5個動作)
- 將雀仔箱上面打開咗嘅雀仔移走，重新放3張雀仔卡
- 將首位玩家牌交畀下一位玩家
玩家行動
- 將手牌入面嘅一張雀仔卡放到玩家板塊上
- 獲得雀仔糧食
- 幫雀仔生蛋
- 獲得雀仔卡
每次進行 i)獲得雀仔糧食 / ii)幫雀仔生蛋 / iii)獲得雀仔卡，需要根據以下方式進行：
- 將行動方塊放到該行最左面冇擺放雀仔卡嘅格仔入面，獲得嗰個格仔嘅福利
- 將行動方塊由右至左移動，發動雀仔卡上面寫有「When Activated」嘅雀仔力量
- 當行動方塊移到最左嗰格就完成整個動作，唔需要移走方塊，留低做紀錄
計算分數
遊戲會喺第4個回合所有動作完成後正式完結，之後就可以利用遊戲提供嘅分紙計算分數。計算嘅分數包括：
- 玩家板塊上所有放置嘅雀仔卡分數 – 卡牌左邊羽毛icon旁數字
- 完成咗嘅Bonus Card分數
- 回合目標板塊分數
- 以下每樣計1分
- 雀仔卡上嘅蛋每粒一分
- 雀仔卡捕捉嘅食物每粒一分
- 插入雀仔卡下嘅雀仔卡每張一分
遊戲體驗
WIngspan每場遊戲大概係一小時內，唔算係一個難學嘅Board Game，大部份嘅玩法都簡單易明，只係說明書都有3本，希望大家睇完Raven呢篇分享，容易啲明白Wingspan嘅玩法，到有需要嘅時候就打開說明書慢慢研究更多。如果鍾意連鎖策略嘅朋友會享受到過程入面，透過唔同嘅雀仔卡牌帶嚟嘅功能影響。喺競爭性方面，基本上每位玩家只需要集中喺自己嘅收集過程，不過因為遊戲加入咗回合目標，所以無論係揀雀仔卡/進行某啲動作嘅時候，都要考慮埋，令到每行一步要更小心，務求自己拎多啲分，對手拎少啲分。就算桌遊新手都好易畀Wingspan超靚嘅外觀吸引而入坑，而且遊戲可以一人遊玩，只要根據返盒入面嘅單人遊玩說明書，就可以隨時玩到，唔洗等朋友陪你玩。
購買Wingspan 展翅翱翔
有睇開我哋嘅Board Game分享，就知道絕大部份Board Game都唔會喺香港買，因為本地網店/實體店主要售賣中文版，食水極深，所以主要都係去Amazon度購買，大家有興趣入手都可以點擊下面嘅affiliate連結購買，我哋網站有機會賺取到少少收入支持網站嘅營運，多謝大家！
