之前同大家喺Black Friday 2021篇文 推介過一啲值得買嘅嘢，而今次同大家介紹嘅Boardgame 7 Wonders (中文翻譯：七大奇蹟)就係當時買嘅，經過一連串嘅學習同試玩，終於可以分享畀大家！簡單幾句介紹呢個遊戲有咩咁吸引：遊戲速度同節奏快，熟習咗之後一場大概20分鐘；遊戲透過抽卡帶嚟更多變化，加上需要同左右兩邊玩家戰爭，增加遊戲趣味；而且遊戲道具同卡牌設計相當精美，好值得收藏！
遊戲故事背景及基本玩法
玩家扮演住七個古代城市嘅領袖，喺遊戲入面透過研究科學、軍事力量、商業發展、興建奇觀，強化自己所屬嘅文明。
遊戲會進行3個回合，每個回合可以叫做「Ages / 世紀 / 時代」，每個回合玩家都會透過使用唔同嘅卡牌去發展自己嘅城市，當中卡牌主要分成「資源」、「民事」、「商業」、「軍事」、「科學」、「公會」六大類。每個世紀完結，每名玩家都需要同鄰國進行戰爭。當3個世紀都進行完畢，每位玩家都要根據各自嘅「 奇觀 」、「財富」、「軍事成果」、「民事發展」、「商業發展」、「科學成就」、「公會成就」7個元素統計分數，最高分嘅玩家就會成為贏家。
遊戲道具和卡牌介紹
遊戲道具包括7張「城市文明版塊」、49張「第一世紀卡牌」 、49張「第二世紀卡牌」 、50張「第三世紀卡牌」 、54個1蚊金幣、24個3蚊金幣、24個戰敗標誌、24個戰勝標記。另外亦有一疊計分紙、說明書、卡牌說明清單、卡牌效果說明清單。下面會逐一介紹主要嘅遊戲道具。
↓撳個廣告可以支持大兄台繼續寫作↓
城市版塊 說明
遊戲總共有7塊代表唔同城市嘅版塊，每名玩家都需要使用一塊。城市文明版塊係雙面設計，分別代表日間同夜晚 (右上角以太陽同月亮圖案反映)；左上角顯示所屬文明天生擁有嘅資源；版塊下方代表所屬城市興建唔同階段嘅奇觀成本同獲得嘅效果。
卡牌 說明
卡牌總共有3疊，分為第一世紀、第二世紀、第三世紀，每張卡牌背面都有顯示所屬嘅世紀同傳牌方向。卡牌正面就分做以下唔同嘅資訊：卡牌上方透過顏色代表佢哋嘅建築物分類， 「紅色」代表 「軍事」、 「藍色」代表 「民事」、 「黃色」代表 「商業」、「綠色」代表「科學」、紫色代表「公會」、啡色代表「原材料」、灰色代表「副產品」；卡牌下方係所屬卡牌嘅插圖；插圖右上方顯示連鎖符號；卡牌頂部都會顯示卡牌名稱；名稱下面會有卡牌代表嘅資源/效果；插圖左上方係使用該卡牌嘅條件；卡牌右下角顯示該卡牌適合嘅遊戲人數。
金幣 說明
金幣係使用卡牌/興建奇觀嘅條件之一，亦都可以用嚟同鄰國購買資源嘅時候使用，分做1蚊同3蚊兩款金幣。 金幣亦係最終計算總分時嘅「財富」，每3蚊可以換做1分。
戰勝/戰敗標誌 說明
遊戲進行3個回合，所以第一世紀、第二世紀、第三世紀完結，分別會進行一場戰爭，玩家需要根據自己軍事卡牌上擁有嘅標誌同左右兩位玩家進行戰爭，第一世紀勝出可以拎代表1分嘅戰勝標誌、第二世紀勝出可以拎代表3分嘅戰勝標誌、第三世紀勝出可以拎代表5分嘅戰勝標誌；而每個世紀戰敗嗰名玩家就要拎扣1分嘅戰敗標誌；平手就無需要拎戰勝/戰敗標誌。
↓撳個廣告可以支持大兄台繼續寫作↓
遊戲基本設定 (Setup)
下面會用遊戲最多支援嘅玩家數目：7人 做例子。將7塊城市版塊隨機分配畀每名玩家，選定玩日間/夜間版塊 (初學建議使用日間)；將第一世紀、第二世紀、第三世紀卡牌分別洗勻放喺枱中間 (注意：由第三世紀卡牌中抽走所有紫色卡，放入遊玩人數+2嘅紫色卡，即9張紫色卡再放入第三世紀卡牌中洗勻)；每名玩家分配3個1蚊金幣；將其餘金幣、戰勝標誌、戰敗標誌放喺枱面容易拎嘅地方就可以準備進行遊戲。
如果人數少過7人，就需要將所有世紀卡牌右下角顯示唔適用人數嘅卡牌抽走，而第三世紀嘅紫色卡就插入遊玩人數+2嘅數量。
遊戲進行方式
每個回合開始，需要派發7張卡牌畀每名玩家，玩家揀選使用嘅1張卡牌保留，每位玩家同時進行所揀選卡牌上嘅動作，然後放喺城市版圖外圍，需要畀所有玩家睇到，其餘卡牌向指定方向傳 (第一世紀：順時針；第二世紀；逆時針；第三世妃：順時針)。回合繼續進行，每次使用一張卡牌。當旁邊玩家傳嚟最後2張卡牌嘅時候，使用一張，並將最後一張卡牌棄置喺枱面嘅棄牌堆中，回合完結。之後，每位玩家需要同左右兩邊玩家進行戰爭，根據戰勝/戰敗分配標誌。進行下一個回合，重覆上面玩法，直至第三個回合戰爭完畢，就可以計算分數。
玩家行為
上面提到玩家每次可以使用一張卡牌，其餘嘅卡牌都需要傳畀下一個玩家，而針對每次使用卡牌，可以分為以下幾個動作：
↓撳個廣告可以支持大兄台繼續寫作↓
- 花費足夠嘅資源/滿足條件，去興建卡牌上嘅建築。當玩家擁有唔足夠資源嘅情況，可以用2蚊向左右兩名玩家購買所需資源 (每款資源可以買一個，但唔限資源種類)，或者根據部份商業卡牌上嘅優勢價購買；
- 賣出該卡牌，換取3蚊；
- 喺滿足興建奇觀嘅條件時，將卡牌反轉，放喺奇觀指定階段之下，玩家可以完全唔興建，亦都可以一個時代完成所有階段
注意：遊戲其中一個使用卡牌 (興建建築)嘅限制係，唔同以使用/興建同名建築卡牌。
計算分數
三個回合完結後，每位玩家可以根據分紙上各種得分細項進行計算，最高分嘅玩家就係當局贏家。
奇觀分數：根據玩家完成嘅階段加總
財富：尚餘嘅金幣每3蚊可換做1分
戰爭分數：根據3個回合戰爭後得到嘅戰勝/戰敗標誌計算
民事分數：根據卡牌上嘅桂冠數字加總
商業分數：根據卡牌上嘅條件，獲得桂冠數字嘅加總
科學分數：分為3個科學符號，單獨收集一個有1分，同款兩個為2嘅平方即4分，三個係3嘅平方即9分，如此類推，5個為25分。另外，集齊3款即一套另外獲得7分。
公會分數： 商業分數：根據卡牌上嘅條件，獲得桂冠數字嘅加總
總結
遊戲部份卡牌嘅連鎖效果，需要玩多幾次之後先會慢慢記得，當所有玩家都熟習，遊戲速度同節奏都會加快，每一場對決花費嘅時間都好少，但係遊戲性就好足夠，呢個遊戲好啱一班鍾意抽卡同輕策略遊戲嘅玩家，有興趣嘅朋友可以去Amazon US購買。
保護好卡牌記得買埋卡套(65mm x 100mm x 148張)：立即購買65mm X 100mm卡套
如果透過以上Amazon連結成功購買，大兄台將獲得些微報酬，多謝支持。
另外，如果你鍾意呢篇介紹，又想睇更多嘅內容，歡迎訂閱大兄台嘅Newsletter、Follow我哋嘅Facebook、Instagram、Twitter。